Kosovë, pesë raste të reja me koronavirus dhe asnjë viktimë

Në Kosovë u konfirmuan të hënën pesë raste të reja me koronavirus.

Instituti Kombëtar i Shëndetësisë Publike të Kosovës tha se rastet pozitive rezultuan pas testimit të 2,007 mostrave.

Sipas njoftimit, në 24-orëshin paraprak, 184 pacientë janë shëruar nga koronavirusi, ndërsa nuk është raportuar për asnjë rast të vdekjes.

Aktualisht, raste aktive me koronavirus në Kosovë janë 2,201.

Që nga konfirmimi i rasteve të para më 13 mars të vitit të kaluar, IKSHPK-ja ka regjistruar gjithsej 107,410 të infektuar, 2,243 viktima dhe 102,966 të shëruar.

Fushata e vaksinimit në Kosovë ka nisur në fund të muajit mars.

Aktualisht janë duke u vaksinuar personat e moshës 65-79 vjeç, pasi fillimisht janë vaksinuar mbi 80-vjeçarët, punonjësit shëndetësorë dhe personat me sëmundje kronike.

Qeveria e Kosovës synon që deri në fund të vitit të vaksionojë 60 për qind të popullatës.

Vaksinat që po përdoren janë AstraZeneca dhe Pfizer/BioNTech.

Të dyja ato duhet të jepen në dy doza për të arritur efektin maksimal.