Gazetar: Suad Bajrami
Kryeministri Hristijan Mickoski thekson që nuk ka asgjë kontestuese që të mos lejohet dhënia e provimit të jurisprudencës edhe në gjuhën shqipe, meqë këtë e lejon Ligji për Përdorimin e Gjuhëve.
“Nuk shoh këtu asgjë, pse të mos kalohet në…” “Ligji për Gjuhët është i qartë në këtë rast. Nëse dikush kërkon ta jep në gjuhën shqipe, duhet t’i lejohet”, deklaroi Hristijan Mickoski, Kryeministër.
Përgjigja e këtillë, është në kundërshtim me atë të Ministrisë së Drejtësisë e cila iu përgjigj negativisht peticionit të studentëve shqiptarë. Arsyetimi i resorit me të cilin udhëheqë Igor Fillkov është se provimi i jurisprudencës është e domosdoshme të jepet në gjuhën maqedonase pasi që nëpërmjet këtij provimi verifikohet njohja e gjuhës maqedonase, e cila është kusht për ushtrimin e funksionit të gjyqtarit, prokurorit, avokatit, noterit apo përmbaruesit.
Për këtë, Bujar Osmani nga BDI kërkon llogaridhënie. “Ministri i Drejtësisë duhet të japë menjëherë dorëheqje. Ndërsa për përfaqësuesit e VLEN-it: më mirë të mos shihen askund për një kohë”, shkruan Osmani.
Opozita shqiptare ditë më parë paralajmëroi se do të dorëzonte ndryshime ligjore për të mundësuar dhënien e provimit të jurisprudencës në shqip. /alsat.mk
