Mbrojtësi i Bajernit beson në përmbysje të rezultatit në Paris

Objektivi i vetëm i Bajernit të Munihut është fitorja dhe përmbysja e rezultatit ndaj PSZH-së për tu kualifikuar për më tej në Ligën e Kampionëve. Në linjë është edhe Xhoshua Kimih, i cili u prononcua në kanalet zyrtare të klubit bavarez përpara kësaj supersfide, duke u treguar besim plotë se bavarezët do t’ia dalin mbanë.

“Jam i bindur se do t’ia dalim, sepse jemi një skuadër më e fortë duke parë lojën e zhvilluar në ndeshjen e parë. Për fat të keq vetëm rezultati nuk na shkoi përshtat. Por jam absolutisht i bindur se do të mund të përmbysim fatin e ndeshjes. Do të jetë edhe mentaliteti që do të vendosim në fushë, por edhe efikasiteti që kemi për të prodhuar lojën tonë. Javën e kaluar kemi patur mentalitetin e duhur, por nuk kemi qenë mjaft efiçent. Nesër do të duhet të kemi të njëjtën kualitet si në ndeshjen e parë”, tha mes tjerash Kimih.