Gazetar: Suad Bajrami
Pas refuzimit nga ana e Ministrisë së Drejtësisë për dhënien e provimit të jurisprudencës në gjuhën shqipe, studentët shqiptarë më 6 prill do të dalin në marsh protestues në Shkup, duke filluar nga Ura e Gurit e deri te objekti i Ministrisë.
“Derisa partitë tona merren të gjejnë fajtorin, janë studentët ata të cilët ngelin peng. Fatkeqësisht. Zbatimi i gjuhës shqipe nuk duhet të jetë në peng të asnjë ministri, të asnjë funksionari. Kushtetuta dhe Ligji për Përdorimin e Gjuhëve janë të qarta”, deklaroi Mevlan Ademi, Student.
Studentët gjithashtu kërkuan nga partitë politike të mos e politizojnë iniciativën e tyre.
“Pra, ju bëjmë thirrje edhe një herë, mos na përdorni si litar duke na tërhequr secili në anën e vet, por na mundësoni zgjidhje reale”, tha Jon Selimi, Student.
Lidhur me iniciativën e Avokatit të Popullit për ndryshime ligjore me qëllim që të lejohet dhënia e provimit të jurisprudencës në gjuhën shqipe, studentët u shprehën që ato ndryshime tanimë është vonë të bëhen, pasi sipas Ligjit për Përdorimit të Gjuhëve, të gjitha ligjet e tjera është dashur të harmonizohen në afat prej 1 viti.
Studentët paraprakisht ndërmorën aksion gueril duke vendosur pankarta me mbishkrime të cilat jepnin porosi se provimi duhet të jepet në gjuhën që i kanë kryer studimet. Në disa prej pankartave, u vërejtën gabime drejtshkrimore.
Ndërkohë ministri i Drejtësisë Igor Fillkov e ka ankimuar aktvendimin e Inspektoratit për Përdorimin e Gjuhëve, i cili i shqiptoi “vërejtje” për mosrespektim të ligjit, pasi refuzon të lejojë dhënien e provimit të jurisprudencës në shqip. Komisioni Shtetëror për Vendimmarrje në Procedurë Administrative dhe Procedurë nga Marrëdhënia e Punës dhe Mbikëqyrje Inspektuese në Shkallë të Dytë, në periudhën në vazhdim duhet që këtë ankesë ta shqyrtojë në seancë. /Alsat.mk.
