“Mjegulla e trurit” pas Covid është pothuajse e barabartë me 10 vjet plakje

Një gjendje e quajtur “mjegulla e trurit” e lidhur me Covid-in e zgjatur është e krahasueshme me plakjen për 10 vjet, sipas një studimi të ri nga King’s College në Londër, MB.

Duke ekzaminuar ndikimin e Covid-19 në kujtesë, studiuesit zbuluan se dëmtimi i trurit ishte më i madh tek njerëzit që rezultuan pozitivë dhe kishin simptoma për më shumë se tre muaj. Një punim shkencor i botuar në The Lancet zbuloi gjithashtu se simptomat tek individët e infektuar vazhduan për pothuajse dy vjet pas infeksionit fillestar.

“Fakti mbetet se dy vjet pas infeksionit të parë, disa njerëz nuk ndihen të shëruar plotësisht dhe jeta e tyre ndikohet ende nga pasojat afatgjata të koronavirusit”, thotë Claire Steeves, profesore në King’s College.

Sipas saj, duhet të punohet më shumë për të zbuluar arsyet pse ndodh kjo dhe çfarë mund të bëhet për të ndihmuar.

Termi “mjegull e trurit” përdoret për të përshkruar një ndjenjë ngadalësimi mendor, marramendje, mosvëmendje, mungesë mendjeje, konfuzion, shpërqendrim.