Бојкотот на наставата во Брњарци и Идризово продолжува

Веќе пет дена учениците од селата Брњарци и Идризова во општина Гази Баба го бојкотираат образовниот процес. Советот на родители на селото Брњарци рече дека нема да се откажат од одлуката за бојкот додека не се реши проблемот. Исто така, Советот на родители соопшти дека не е исклучена можноста за организирање протести и блокирање на улици.

„Децата одат еден кај друг и си ги пишуваат домашните задачи, колку што можат гледаат на телефон и интернет. Додека не се најде решение за овие деца, ние ќе бојкотираме, дури и ако е потребно, нема да ги пуштиме да одат преку цела година. Нашиот единствен начин да продолжиме се протестите да бидат малку порадикални, да го блокираме училиштето и да не дозволиме влез и за другите деца или пред општината да излеземе и да им ја блокираме работата“.

Во приградското училиште „Крсте Мисирков“ во селото Брњарци малку ученици учат во паралелки по македонски јазик. По завршувањето на часовите на овие ученици, училиштето се затвора додека околу 60 ученици Албанци кои живеат во ова село се принудени да посетуваат настава во училиштата во Арачиново. Во меѓувреме, советот на родители во Идризово предупреди на блокади на улиците доколку не се одржи бараната средба со првиот човек на Гази Баба, Борис Георгиевски.

„Ако не го одржиме тој состанок во текот на овие денови, тогаш планираме во петок да одржиме протест со блокирање на еден од главните патишта. Ќе го блокираме патот и ќе продолжиме додека не седнат и не ги слушнат нашите барања, но не само да ги слушаат, туку ова мора да се реализира или заврши како што се нашите барања“.

На првиот училишен ден протестираа и родителите и учениците од село Идризово, кои бараа образование на албански јазик од шесто до деветто одделение, во основното училиште „Њeгош“ во Јурумлери. Во 2019 година, општина Гази Баба го одби барањето за отворање албански паралелки во ова училиште. Потоа одлучи да изгради ново училиште во Идризово каде што ќе учат сите деца од селото. Но, одлуката за ново училиште остана само на хартија.

Мелихате Рустеми