Боки 13 тврди: Заев, Кирацовски и Богоев знаеја сѐ за „Меѓународен сојуз“

Ослободителна пресуда бара обвинетиот Бојан Јовановски познат како Боки 13 во случајот „Меѓународен сојуз“. Според него, не е докажано дека тој ги направил кривичните дела, ниту другите обвинети. На Боки 13 му се суди за перење пари и измама на бизнисмените Силјан Мицевски и Ардијан Амзовски, за сума од речиси еден милион евра. На преговарање со нив не присуствувала обвинетата Христина Блажевска, туку повремено Јасна Ерцеговиќ и поранешната пратеничка на СДСМ Фросина Ременски, но таа, според Јовановски, не била единствениот политичар. Дека Ресул Лога и Ардијан Амзовски од „Дрим билдинг“, на Боки 13 му искеширале 350.000 евра, наводно за изградба на старечки домови, знаеле и други политичари.

„Тоа е Зоран Заев, Александар Кирацовски и Стефан Богоев. Александар Кирацовски…
– За кој доказ конкретно зборите Бојан?
– За овие 350.000 евра.
– Од кој доказ произлегуваат трите личности коишто ги споменавте?
– Од вербалниот исказ на Ардијан Амзовски кога вели дека да не ги видел тие функционери, мене не би ми дал ни еден денар. Токму од овој. Силјан го спомнувам, но сега сум за Адријан. Токму од овој доказ.
– Дали по име беа споменати во исказот на Адријан Амзовски?
– Па, функционери се, еве јас ги споменувам по име.
– Не произлегуваат, значи ова е ваша одбрана.“

Боки 13 тврдеше дека тој бил злоупотребен од екс-премиерот Заев. А, немал намера да ги доведе во заблуда компаниите „Пелистер“ и „Дрим Билдинг“.

„Во смисла на споменатите 350.000 евра, имавме признание пред овој суд дека постоела добра волја од моја страна да бидат вратени. Тоа беше изведено и кажано на рочиште за главна расправа. Кажувам дека јас тие средства на Ардијан Амзовски, иако не беа земени за проектот, туку за други цели, му ги враќав на неколку пати, како бев во можност и вратени се повеќе од 350.000 илјади евра, односно вкупно се вратени 360 000 евра“, рече Бојан Јовановски – Боки 13, обвинет.

Со денешните завршни зборови на Боки 13, судењето за случајот „Меѓународен сојуз“ заврши. Пресудата ќе биде објавена на 7 април.

Игор Стефановски