Кичеец бил излезен од затворот со потребната медицинска документација, вели Заев

Премиерот Зоран Заев денеска повтори дека директорот на Управата за извршување санкции го информирал оти Зоран Милески Кичеец ја имал целата потребна медицинска документација за да му бидат дадени триесет дена за лекување. Доколку некој има поинакви информации, рече Заев, тогаш треба тие да се објават.

-Сите треба да бидеме еднакви по закон и на сите ни следуваат еднакви обврски и ни следуваат еднакво и правата. Не ги знам деталите навистина. Вие ми кажувате дека требало седум дена, јас знам дека има медицинска документација, информиран сум од директорот на Управата за извршување на санкции. По самите документи законот е јасен. Веднаш може да се обелодени во јавноста доколку има одреден пропуст. Но, јас знам дека сите наши граѓани ко што се на издржување на казна после одреден период од издржувањето на казната имаат право на викенд, на одреден одмор, имаат право секогаш во издржување на казната и на здравствено лекување, рече Заев одговарајќи на новинарско прашање.