Пазарниот инспекторат денеска доведе уште двајца за да извршат увид во замрзнувањето на цените на храната. Премиерот Ковачевски и министерот Бектеши сепак, не наидоа на добредојде од сите муштерии во скопската населба Тафталиџе. Додека шефот на Владата се шеташе низ маркетот придружуван од министерот за економија и директорот на Пазарниот инспекторат, неколку госпоѓи со празни кошници им ја расипаа „парадата“.
Утре на владина седница ќе се дебатира за замрзнување на цените на дел од производите за хигиена. Се очекува и да се намалат цените на некои од најпотребните продукти. Во меѓувреме, до крајот на неделава ќе се разгледаат и пазарните анализи за овошјето и зеленчукот, за некои од нив се очекува замрзнување. Но, месните производи се на дното на листата, иако нивната потрошувачка е зголемена за време на Рамазан.
Но, замрзнувањето на цените почна да носи негативни ефекти. Имено, Алсат дојде до индиции дека нелегални трговци на големо купуваат јајца од маркетите низ земјава и ги препродаваат во странство, каде цената е повисока.
„Вашиот пример беше одличен, тоа се случуваше порано, сега имаше обиди да се направи истото, особено на пазарот со јајца, бидејќи во регионот недостига производство на јајца и што се случува? Некои трговци, како што истакнавте, на зелените пазари, купуваат директно од супермаркетите и ги препродаваат истите производи бидејќи со владините одлуки за замрзнување на цените, супермаркетите мораат да задржат одредени количини или 70% од она што го снабдиле минатиот месец. Значи ќе има други мерки“, рече министерот за економија, Крешник Бектеши.
Пазарниот инспекторат брои 160 инспектори низ државата. Ним им се приклучија Трудовиот инспекторат и Агенцијата за храна и ветеринарство. Директорот на Пазарниот инспекторат Горан Трајковски вели дека цел на инспекцијата покрај маркетите, ќе бидат и пазарите за да се спречи злоупотреба на цените.
Директорот на Пазарниот инспекторат рече дека во над 500 надзори извршени во последните 5 дена изречени биле 6 казни или само кај 1% од фирмите било констатирано дека не ги почитуваат мерките за замрзнување на цените. Овие глоби изнесуваат 750.000 денари, но надлежните не ги објавуваат нивните имиња додека не завршат постапките, односно евентуалните жалби и плаќањата. Истото е направено и со останатите 4 казни за производителите на леб, каде казните се движат од 800 до 10.000 евра.
Аднан Ќаили
