Охридската болница за срцеви заболувања уште чека ангиограф
Охридската болница за срцеви заболувања уште чека ангиограф
Бројните ветувања со години дека охридскиот центар за кардиоваскуларни заболувања, кој е регионален ќе добие уште еден ангиограф останаа само празни зборови .Болницата работи со само еден ваков апарат, кој е неопходен за третирањато на пациенти со кардиоваскуларни заболувања.За да може да се реализира планот Охрид да прерасне во регинален центар и за третман на акутен мозочен удар, а пациентите да немора да се препраќаат во Скопје потребно е проширување на капацитетите и итно доопремување на болницата.
„Приоритетно е она што години наназад го кажуваме, а тоа е уште една ангио сала и уште еден ангиограф..Ние имаме доставено и идеен проект за уште една сала која би значела намалување на листата на чекање на пациентите но и резервен апарат.Години наназад се случуваше дефект на апаратот, а пациентите беа праќани на Клиниката за кардиологија во Скопје, беа одложувани елективните пациенти што е голем проблем“, изјави Елена Коваческа Башуроска- директорка.
Неодамна при посетата на болницата нов ангиограф вети и заменик министерката за здравство,Маја Манолева.Но и сите ресорни министри за здравство постојано ветуваа дека проблемот ќе се реши.
„Барањата од институцијата се стигнати во министерството за здравство и се надеваме дека во наредниот период ќе можеме позитивно да одговориме на се она што се бара поради реалните потреби на нашите граѓани односно пациентите“, рече Маја Манолева-заменик министерка за здравство.
Болницата е втора по големина во државата.и во неа се третираат пациенти со сериозни срцеви заболувања од целиот Југозападен дел на државата многу често и од други градови и од соседна Албанија. Центарот покрива територија со повеќе од 350.000 жители,годишно се изведуваат преку 2500 интервентни процедури,а секојдневно се преку 120 специјалистички прегледи.
Мики Трајковски