Бугрскиот претседател Румен Радев ги закажа парламентарните избори за 2 октомври годинава и назначи преодна влада на чело со премиерот Галаб Донев.
Бугарските медиуми објавија дека согласно чл. 99, ст. 5 од Уставот на Република Бугарија, претседателот Румен Радев потпишал указ за распуштање на 47. Народно собрание на 2 август 2022 година и закажа избори за Националното собрание на 2 октомври 2022 година.
Со друг указ, претседателот Румен Радев назначи преодна влада од 2 август 2022 година. Шефот на државата ќе ги претстави задачите и приоритетите на преодната влада на церемонија што ќе се одржи утре напладне по локално време.
Преодната влада ја сочинуваат:
Галаб Спасов Донев – вршител на должноста претседател на Владата на Република Бугарија;
Лазар Манолов Лазаров – вицепремиер за социјална политика и министер за труд и социјална политика;
Христо Владимиров Алексиев – вицепремиер за економски политики и министер за транспорт и врски;
Иван Петев Демерџиев – вицепремиер за јавен ред и безбедност и министер за внатрешни работи;
Атанас Ангелов Пеканов – вицепремиер за управување со европски фондови;
Росица Атанасова Велкова-Желева – министерка за финансии;
Димитар Жељазков Стојанов – министер за одбрана;
Асен Георгиев Меџидиев – министер за здравство;
Иван Димитров Шишков – министер за регионален развој и јавни работи;
Сашо Георгиев Пенов – министер за образование и наука;
Николај Милков Милков – министер за надворешни работи;
Крум Костадинов Зарков – министер за правда;
Велислав Величков Минеков – министер за култура;
Росица Атанасова Карамфилова-Благова – министерка за животна средина и води;
Јавор Илиев Гечев – министер за земјоделство;
Никола Руменов Стојанов – министер за економија и индустрија;
Росен Иванов Христов – министер за енергетика;
Александар Георгиев Пулев – министер за иновации и раст;
Илин Павлинов Димитров – министер за туризам;
Весела Николаева Лечева – министерка за млади и спорт.
Георги Георгиев Тодоров – министер за е-влада.
Пред неколку дена, бугарските социјалисти (БСП) не успеаја да направат мнозинство и го вратија мандатот за состав на нова влада, откако не помина нивниот обид како точка на дневен ред да биде вметната програмата за работа на парламентот за наредните шест месеци.
Таа доби поддршка од 119 пратеници, 106 беа против, а еден пратеник се воздржа од гласање.
Социјалистите претходно најавија дека доколку се реализира нивната идеја, односно предлогот добие 121 глас „за“, тие веднаш ќе ја отпочнат постапката за избор на нова влада, со Асен Василев како кандидат за премиер.
Минатата година во Бугарија беа одржани три последователни изборни циклуси. Дури во последниот обид беше направена влада предводена од новиот политички субјект „Промената продолжува“, во која клучна улога имаше двоецот Кирил Петков – Асен Василев, двајцата министри во техничките влади на претседателот Румен Радев.
Нивната коалиција, во која партиципираа и БСП, Демократска Бугарија и ИТН траеше нешто повеќе од шест месеци. Кабинетот на Петков беше избран на 13 декември минатата година. Недоверба на неговата влада и беше изгласана на 22 јуни оваа година.
