СОНК: МОН да го повлече дописот за одработување на деновите за изборите
Претседателот на СОНК, Јаким Неделков, бара од министерот Јетон Шаќири веднаш да го повлече дописот испратен до училиштата во кое пишува дека деновите на изборите, 24 април и 8 мај, треба да се одработат.
„Од кога неработните денови преку ноќ стануваат работни? Министерот за образование веднаш да го повлече известувањето до училиштата со кое се задолжуваат да ги одработат ‘неработните’ денови, прогласени од Владата заради одржување на претстојните избори! Впрочем, и други учебни години завршувале и биле верифицирани од страна на министерот со помалку од 180 работни денови, како на пример учебната 2021/22 година“, пишува Неделков во објавата на Фејсбук.
Владата ги прогласи за неработни за сите граѓани деновите на одржување на изборите, 24 април и 8 мај, поради непречено одржување на изборниот процес. Тие денови, како што соопштија оттаму, нема да се одработуваа.
