Засега нема индикатори дека пожарот во Тетово е подметнат, вели Пендаровски

Моментално нема индикатори дека пожарот во тетовската модуларна болница е подметнат, рече во изјава за медиумите претседателот на државата, Стево Пендаровски. Како што додаде тој, слично прашање изутринава имал и во разговорот со словенечкиот претседател, Борут Пахор.

„Бидејќи имаше и такви шпекулации и словенечкиот претседател, Пахор, утрово ме праша исто…има шпекулации дека е можеби подметнато, дека има врска со 30 години независност, дека има некакви конспирации…до овој момент нема никаков индикатор дека ова е направено намерно со цел да се постигне некоја политичка цел“, рече Пендаровски.