Nuk ka masa shtesë për Covid-in, situata epidemiologjike në vend është stabile

Situata epidemiologjike në vend është stabile. Për momentin, nuk ka nevojë për masa të reja shtesë për Covid-in. Ka rritje të rasteve të reja, por Komisioni për Sëmundjet Infektive në mbledhjen e fundit ka konstatuar se sipas numrit të shtretërve të lira spitalore dhe numrit të vdekjeve jemi ende në zonën e gjelbër.

Masat për mbajtjen e detyrueshme të maskës mbrojtëse në transportin publik, objektet shëndetësore, farmacitë dhe ambientet për kujdesin e të rriturve dhe personave me aftësi të kufizuara mbeten të vlefshme.

Kryetari i Komisionit për Sëmundje Infektive, Aleksandar Petliçkovski dje në një paraqitje të ftuar në TV Sitel tha se në këtë moment nuk kemi ndonjë presion të madh në sistemin shëndetësor.

“Edhe pse numri i rasteve me Covid-19 po rritet me shpejtësi, pak njerëz shkojnë në spital dhe një përqindje akoma më e vogël e tyre kanë ecuri të rëndë të sëmundjes. Duke pasur parasysh se presioni në sistemin tonë shëndetësor nuk është serioz, nuk planifikojmë të shtrëngojmë masat”, tha Petliçkovski.

Ai theksoi se ndoshta për shkak të përqindjes serioze të imunitetit të fituar tashmë me vaksina dhe sëmundjeve të mëparshme, tabloja klinike e lidhur me këtë variant të ri të Covid-19 nuk është e rëndë dhe për rrjedhojë numri i rasteve të rënda, numri i vdekjeve është shumë i ulët. .

“Kjo na jep të drejtën të presim që në muajt e ardhshëm do të duhet dhe do të mund të jetojmë me koronën, ta pranojmë atë si sëmundje të ngjashme sezonale, endemike dhe të përpiqemi ta kthejmë jetën në normalitet”, shtoi Petliçkovski.