Ohri shpëtoi edhe një herë nga UNESCO

Gazetar: Miki Trajkovski

Ohri me rrethinë shpëtoi sërish. UNESCO ka vendosur të mos i vendosë në listën e Trashëgimisë Botërore në Rrezik për momentin. Maqedonisë dhe Shqipërisë i jepet një periudhë prej 5 vitesh, për të zbatuar përfundimisht të gjitha vëzhgimet dhe rekomandimet e mëparshme.

Trajtimi i urbanizimit masiv dhe prishja e objekteve të paligjshme janë ndër detyrat kryesore, që janë kërkuar prej disa vitesh. Autoritetet ende sigurojnë se do të fillojnë zbatimin e tyre.

“Po, ato që do të shënohen si problem serioz, domethënë diçka për të cilën duhet të ndërmarrim veprime, jemi në korrelacion me shtetin këtu dhe do të ketë ndryshime të caktuara në këtë çështje”, deklaroi Kiril Pecakov-Kryetar i Komunës Ohër.

Ministri i Jashtëm Mucunski thotë se korniza për atë që duhet bërë është e qartë, por disa nga këto vendime janë komplekse.

“Ka raste specifike që duhen zgjidhur një nga një, dhe këto janë çështje që janë përgjegjësi e përbashkët midis autoriteteve qendrore dhe lokale. Nëse më pyet mua, kur bëhet fjalë për ndërtime të paligjshme kudo, jo vetëm në Ohër, ato duhet të hiqen. Duhet të bëhen në një mënyrë të përshtatshme dhe ligjore. Statusi i UNESCO-s, duhet të shkojë krah për krah me zhvillimin turistik, ekonomik dhe shoqëror të të gjithë rajonit. Nuk duhet të pësojë regres vetëm sepse ka statusin e UNESCO-s”, theksoi Timço Mucunski-Ministër i Punëve të Jashtme.

Për Konstantin Zdraveskin, një aktivist mjedisor, vendimi i UNESCO-s nuk duhet të jetë shkak për kënaqësi, por për shqetësim serioz. Ai thotë se kjo do të vazhdojë agoninë e Ohrit.

“Për mua, ky është një vendim jashtëzakonisht zhgënjyes, sepse pas kaq shumë vitesh pune për të mbrojtur rajonin e Ohrit, kjo më tregon se edhe UNESCO, si organizatë nuk është më e interesuar në mbrojtjen e rajonit të Ohrit, sepse nëse do të ishte kështu, do ta kishte futur në atë listë”, tha Konstantin Zdravevski, aktivist i ekologjisë.

Për ekspertët, përfshirja e rajonit të Ohrit në listën e rajoneve në rrezik nuk do të thotë një ndëshkim, por një mundësi për mbështetje më të madhe ndërkombëtare, përfshirjen e ekspertëve nga fusha të ndryshme, që mund të ndihmojnë në zgjidhjen e problemeve, si dhe ndihmë më të madhe financiare./Alsat.mk.