Paralajmërim: Variantet e reja të Covid mund të shfaqen këtë dimër
Variantet krejtësisht të reja të virusit mund të shfaqen këtë dimër, tha agjencia e barnave të Bashkimit Evropian, por vaksinat ekzistuese duhet t’i mbrojnë njerëzit nga një formë e rëndë e sëmundjes dhe vdekja.
Ndërsa BE përgatitet të nisë një fushatë vaksinimi përpara një vale të rasteve të reja të koronavirusit më vonë këtë vit, Agjencia Evropiane e Barnave (EMA) ka theksuar se virusi ende qarkullon dhe evoluon me shpejtësi.
“Mund të ketë një variant krejtësisht të ri që ne nuk mund ta parashikojmë sot,” tha shefi i vaksinave EMA, Marco Cavalleri në një konferencë shtypi të premten.
Prandaj, strategjia evropiane është që të ketë një gamë të gjerë vaksinash të përditësuara që janë përshtatur për t’iu përgjigjur varianteve të reja.
EMA miratoi së fundmi vaksinat nga Pfizer-BioNTech dhe Moderna që janë përshtatur për të luftuar nënvariantin BA 1 omicron.
Versioni i Pfizer i përditësuar për shtamet dominante BA 4 dhe 5 do të miratohet në mes të shtatorit, ndërsa një vaksinë e ngjashme nga Moderna është gjithashtu në gatishmëri, raporton Aljazeera.
