Gazetare: Fatlume Dervishi
Që nga zgjidhja e problemit me ujin e pijshëm, deri te përmirësimi i kushteve dhe zhvillimi i turizmit, ndërtimi i infrastrukturës rrugore, mbrojtja e banorëve nga kafshët e egra pore dhe organizimi i deponive, kandidatët për Komunën e Mavrovë Rostushës, kanë fokusuar të gjithë fushatën e tyre, në takime me banorët dhe në rrjetet sociale.
Kandidati për kryetar komune nga VMRO-DPMNE-ja, Oner Jakuposki dhe ai i LSDM-së Anes Ahmeti thonë se kanë paraparë projekte konkrete për të gjitha këto probleme dhe se do të punojnë për zgjidhje në mandatin e ardhshëm.
“Në programin tonë kemi paraparë rikonstruksion dhe ndërtim të plotë të rrjeteve të ujësjellësit në të gjitha vendbanimet ku ka nevojë për këtë, duke përfshirë rikonstruksionin e burimit të Beliçkës, si dhe pjesërisht rikonstruksionin e rrjetit të ujësjellësit në fshatin Skudrinë” tha Anes Ahmeti, kandidat për kryetar komune nga radhët e LSDM-së për Komunën e Mavrovë-Rostushës.
“Vlerësojmë se me ndihmën e Ministrisë së Mjedisit Jetësor si ministri kompetente dhe së bashku me Ministrinë e Transportit do t’i përmirësojmë kushtet dhe furnizimin me ujë edhe në vendbanimet e tjera ku realisht ka nevojë”, u shpreh Oner Jakuposki – kandidat për kryetar të Komunës së Mavrovë–Rostushës nga radhët e VMRO-DPMNE-së.
Dy kandidatët janë të vetmit në këtë garë të përsëritjes së zgjedhjeve. / Alsat.mk
