Pse është më e vështirë për ne të ngrihemi nga shtrati kur bie shi?
Zhurma e shiut të lehtë mund të jetë relaksuese, por gjithashtu mund të na bëjë të ndihemi letargjikë.
Grija e vjeshtës dhe shiu e bëjnë largimin nga ngrohtësia e shtratit një sfidë të vërtetë. Por pse ditët me shi ndikojnë kaq shumë në energjinë dhe humorin tonë? Psikologia Dr. Rachel Molitor nga Universiteti i Coventry-t shpjegon pse është e vështirë të zgjohesh kur bie shi dhe si t’i bësh mëngjeset me shi më të lehta. Sipas Dr. Molitor, ditët me shi i bëjnë shumë njerëz të ndihen letargjikë.
“Për disa, shiu përforcon dëshirën për të qëndruar brenda dhe për të ngadalësuar ditën, ndërsa për të tjerët mund të shkaktojë një ndjenjë aventure”, shpjegon Dr. Molitor. Reagimet tona ndaj shiut varen nga përvojat e kaluara dhe nga mënyra se si e perceptojmë shiun.
“Nëse planifikojmë ta kalojmë ditën brenda, shiu mund të mos ketë aq shumë ndikim. Por nëse kemi planifikuar aktivitete në natyrë ose një udhëtim të gjatë, shiu mund të shkaktojë zhgënjim.”
Shiu shpesh vjen me qiell gri dhe më pak rrezet e diellit, gjë që ndikon në orën tonë të brendshme.
“Ritmet tona cirkadiane varen nga rrezet e diellit – kur ka më pak dritë, truri sinjalizon se është natë, gjë që mund të zvogëlojë vigjilencën tonë”, shpjegon Molitor. Ndriçimi i dobët mund të ngadalësojë trupin tonë, të ulë motivimin dhe ta bëjë të vështirë ngritjen nga shtrati. Gjithashtu, i ftohti rrit ndjesinë e rehatisë nën një batanije të ngrohtë, duke e bërë të vështirë ngritjen nga shtrati.
“Rënia e temperaturës mund të rrisë dëshirën për të kursyer energji, duke e bërë më të vështirë zgjimin në mëngjes dhe fillimin e ditës”, shton Molitor.
Zhurma e shiut ka një efekt qetësues dhe mund të na bëjë të përgjumemi. “Zhurmat e buta të shiut qetësojnë dhe nxisin relaksimin”, thotë Dr. Molitor.
“Gjatë ditëve me shi, prodhimi i kortizolit, hormonit që na mban zgjuar, zvogëlohet, ndërsa melatonina, hormoni që nxit gjumin, rritet.” Kombinimi i këtyre faktorëve shpesh çon në ndjenja lodhjeje dhe letargjie, duke i bërë mëngjeset me shi një sfidë të veçantë.
Si ta bëni zgjimin në ditët me shi më të lehtë? Mundohuni të kaloni sa më shumë kohë të jetë e mundur në dritë natyrale dhe siguroni një rutinë të ngrohtë për një fillim më të lehtë të ditës.
