Reagime të ashpra rreth kërkesës për falje të Boban Iliçit dhe shumë të dënuarave të tjerë

Adrian Kerimi

Aleanca për shqiptarët hodhi ngjyrë të kuqe para godinës së Ministrisë së Drejtësisë, në shenjë revolte për tentimin e faljes së të dënuarve në mesin e të cilëve edhe Boban Iliç. Opozita shqiptare kërkon dorëheqjet e krerëve të Drejtësisë, Mariçiq dhe Nuhiu. Sipas ASH-së Qeveria është e gatshme të shkelë mbi gjakun e viktimave si Almir Aliut me qëllim ruajtjen e pushtetit.

“Këto janë njerëzit të cilët janë të gatshëm të shkelin mbi gjakun e Almirit, të gatshëm të shkelin mbi gjakun tonë, mbi gjakun e qytetarëve. Me të vetmin qëllim, për t’i mbrojtur pozitat e tyre ministrore. Bëhet fjalë për ministrin, zëvendësministrin dhe gjithë kabinetin qeveritar”- deklaroi Omer Ajdini, Aleanca për Shqiptarët.

Lëvizja Besa kërkon nga Presidenti Stevo Pendarovski të mos e nënshkruaj faljen e Boban Iliqit dhe të dënuarve të tjerë.

“I bëjmë thirrje të gjithë institucioneve kompetente, në rastin konkret Presidentit të shtetit, Stevo Pendarovskit që të marrë seriozisht rastet e ndjeshme dhe të reflektojë dhe të mos e nënshkruaj faljen e tyre”- thanë nga Lëvizja Besa.

Alternativa alarmon kryeministrin Zoran Zaev se me këtë kërkesë të Drejtësisë, lëkundur marrëveshja për bashkë-qeverisje.

“Duke shpresuar se as kryeministri aktual dhe as kryeministri i ardhshëm nuk duan ta luhatin bashkëpunimin e Alternativën, presim nga ata që ta tërheqin kërkesën nga Presidenti dhe nga ana tjetër menjëherë të fillon zbatimi i marrëveshjes së dakorduar Gashi-Zaev”- pohoi Nurxhan Asanovska, Alternativa.

Në reagimin e tyre VMRO DPMNE-ja theksin e vë tek i dënuari Aleksandar Vasilevski Ninxha. Partia e Mickoskit akuzoi Qeverinë LSDM-BDI për gjendjen në gjyqësor

“Regjimi i LSDM-së dhe BDI-së dënoi me mbi 200 vite burg në bazë të deklaratës së Aleksandar Vasilevskit-Ninxha, ndërsa ai do të shëtisë i lirë nëpër rrugë. Mbi 200 vjet burg, Ninxha i falur nga Pendarovski me propozim të Mariçiqit dhe Zaevit. Kjo është fotografia për padrejtësinë dhe jo të drejtën në Maqedoni me LSDM-në dhe BDI-në”- tha Naum Stoilkovski, Zëdhënës i VMRO DPMNE-së.

Reagimeve politike nuk iu bashkëngjit LSDM-ja e Dimitar Kovaçevskit.