Red Bull me triumf të dyfisht në Baku, dështon totalisht Ferrari
Në Baku të Azarbejxhanit , Maks Verstapen fiton përpara Karlos Perezit dhe Xhorxh Rasellit. Nje zero e dyfishte për Ferrarin, pasi që Leklerk tërhiqet kur është në krye, ndërsa gara e Sainzit përfundoi pas nëntë xhirosh për shkak të një problemi hidraulik.
Katastrofë është fjala e cila përmbledh më së miri përformancën e Ferrarit në Azerbaixhanm teksa ai që fitoi garën ishte Maks Verstapen i cili u nis nga vendi i tretë dhe e përfundoi në shkallën më të lartë të podiumit. Shenjat se nuk do të ishte një ditë e mirë për “kokëkuqjen” u panë që në start me Serhio Perez i cili parakaloi Sharll Leklerku që u nis nga pozita e parë. Ndërkohë, monegasku i rezistoi sulmeve të Maks Verstapent, ndërkohë që në xhiron e katërt, Sainz tërhiqet nga gara për shkak të problemeve me marshet.
Në vazhdim, Leklerk futet në bokse dhe Verstapenit i hapet rruga për të parakaluar Perez e për të marrë kryesimin, ndërsa meksikanit iu bë e qartë nga skuderia se nuk duhej të luftonte ashpër me shokun e skuadrës për të mos rrezikuar përplasjen.
Gjithsesi, në xhiron e 20-të kur Leklerk kishte marrë kryesimin e garës pasi Verstappen u fut në bokse, ndodh e papritura. Motorri i Ferrarit përfundon në tym dhe Leklerk detyrohet të tërhiqet me pilotin holandez dhe Perez që kishin rrugën e hapur për të dërguar “Red Bull”-in te triumfi.
Për Verstapenin ishte suksesi i parë në pistën e Baku (triumfi i pestë nga tetë gara në këtë sezon), ndërsa tashmë kampioni i Botës në fuqi arratiset në krye të klasifikimit me plot 150 pikë, ndërsa ndiqet nga Perez që ka grumbulluar 129 pikë, teksa shpresat e Leklerk për një sukses në këtë Botëror marrin një goditje të madhe me 23-vjeçarin që mbetet në kuotën e 116 pikëve.
Sa i përket pjesës tjetër të pilotëve, një paraqitje e shkëlqyer edhe nga Xhorxh Rasellit me Mercedesin i cili e mbylli garën në vendin e tretë dhe ruan traditën e këtij sezoni teksa në asnjë prej garave të zhvilluara deri më tani nuk është renditur asnjëherë më poshtë se vendi i pestë. Nga ana tjetër, Hamilton u rendit i katërti, ndërsa pas britanikut u rendit Gasly. Në vendin e gjashtë Fetel, ndërsa në dhjetëshen e parë përfunduan edhe Alonso, Rikiardo, Norris e Okon.
Gara e radhës është më 19 qershor në Kanada.