Sa herë në ditë duhet të urinoni sipas moshës?

Gjinia, shtatzënia dhe gjendjet mjekësore, duke përfshirë infeksionet e traktit urinar, kancerin e prostatës ose të fshikëzës, sklerozën multiple dhe goditjen në tru, gjithashtu mund të ndikojnë në shpeshtësinë e urinimit, por faktori kryesor që ndikon në shpeshtësinë e urinimit është mosha juaj.

“Gjatë jetës së një pacienti, ka të ngjarë të ketë disa ndryshime në zakonet e përdorimit të tualetit”, thotë Hamid Abudi, një urolog konsulent në Spitalin New Victoria në Glasgow.

Fëmijët: Gjashtë deri në 14 herë në ditë

“Fëmijët e vegjël mund të urinojnë tetë deri në katërmbëdhjetë herë në ditë, dhe tek fëmijët më të rritur kjo ulet në gjashtë deri në dymbëdhjetë herë”, thotë Abudi.

Nëse fëmija juaj duhet të urinojë më shpesh, kjo mund të jetë për shkak të njërit prej problemeve të mëposhtme: ankthi, konsumi i kafeinës e cila rrit prodhimin e urinës dhe mund të shkaktojë spazma të muskujve të fshikëzës, kapsllëk, konsumimi i përbërësve ndaj të cilëve fëmija është alergjik, mbajtja e urinës për një kohë shumë të gjatë, kapaciteti i ulët i fshikëzës dhe anomali strukturore të fshikëzës ose uretrës.

Adoleshentët: Katër deri në gjashtë herë në ditë

Ndërsa adoleshentët zakonisht urinojnë rreth katër deri në gjashtë herë në ditë, nuk është e pazakontë që kjo të rritet gjatë pubertetit dhe çekuilibrave hormonalë që vijnë me të. Aboudi tha se shumicën e kohës, kjo nuk është asgjë për t’u shqetësuar dhe do të zgjidhet natyrshëm, por shtoi se mund të jetë potencialisht një shenjë e diçkaje më serioze.

Nëse urinimi i shpeshtë vazhdon, kjo mund të shkaktohet nga probleme të tilla si infeksionet e traktit urinar (UTI), diabeti, konsumi i tepërt i kafeinës ose, në raste të rralla, kanceri i fshikëzës.

Të rriturit nën 60 vjeç: Gjashtë deri në nëntë herë në ditë

Urologu thotë se është normale që shumica e të rriturve të urinojnë pesë deri në tetë herë gjatë ditës dhe një herë natën, varësisht nga rrethanat. Megjithatë, ai shton se gratë kanë tendencë të urinojnë më shpesh se burrat, duke cituar një studim që zbuloi se gratë urinojnë mesatarisht 5.6 herë në ditë, ndërsa numri i burrave ishte 4.8.

“Tek gratë, shtatzënia mund të jetë një shkak, pasi presioni i foshnjës në mitër mund të shkaktojë rritje të frekuencës së urinimit. Infeksionet e traktit urinar janë gjithashtu shumë të zakonshme tek gratë dhe mund të çojnë në rritje të frekuencës së urinimit”, shpjegoi ai.

Të rriturit mbi 60 vjeç: Deri në 10 herë në ditë

Ndërsa plakemi, funksioni i veshkave fillon të bjerë dhe muskujt e fshikëzës dobësohen. Urinimi natën është gjithashtu më i zakonshëm. Të moshuarit kanë më shumë gjasa të marrin diuretikë, dhe kjo mund të çojë në vizita më të shpeshta në tualet gjatë gjithë ditës dhe natës.

Ai shton: “Tek burrat, ndërsa plaken, prostata zmadhohet. Kjo ushtron presion mbi fshikëzën dhe mund të rrisë numrin e herëve që urinoni”, tha ai.