Seancë për Modularin e Tetovës, Dëshmojnë mjekët dhe familjarët e viktimave

Mjeku Mustafa Tahiri dhe Shpenza Arifi të cilët kanë qenë në ndërrim natën kur ka ndodhur zjarri në Spitalin modular dëshmojnë sot në Gjykatën e Tetovës mbi rastin tragjik.

Mjeku Tahiri tha se zjarri ishte përhapur për 10 sekonda dhe dhoma ishte shkrumbuar.

“Fillimisht kam tentuar të ndaloja zjarrin më batanijet e pacientëve e më pas dola për të kërkuar kofe me ujë që nuk gjeta”, tha Tahiri.

Më pas ai dëshmoi se kishe shkuar deri te Klinika infektive për të kërkuar ndihmë e derisa ishte kthyer e kishte parë gjithë modularin në zjarr.

“Atëherë e vetmja mënyrë për të ndihmuar ishte përmes dritares të ndihmoja. Nuk e mbaj mend nëse ka pasur portier te dera e Modularit apo jo sepse ne hynim nga hyrja e personelit”, u shpreh Tahiri.

Ndërkohë doktoresha Shpenza Arifi e cila ka qenë në ndërrim me mjekun Mustafa Tahiri tha se kishte kërkuar nga motrat që të sillnin aparate kundër zjarrit por nuk kishin gjetur.

Sipas dëshmive zjarri kishte shpërthyer fillimisht te koka e pacientes dhe murrit e më pas ishte përhapur gjithandej. Pacientja kish qenë e shtruar për një periudhe aty ndërsa ishte me nevoja të posaçme. Me te kishin qëndruar dhe familjare të saj për shkak të gjendjes së saj të rëndë shëndetësore.

Gjate seancës dëshmoi gjithashtu dhe nëna e njërit nga të mbijetuarit. Fillimisht ajo tha se kishe dëgjuar britma dhe piskama si dhe kishte parë motra të cilat ishin munduar me shishe me ujë të ndalojnë përhapjen e zjarrit. Gjate dëshmisë ajo tha se kishte qëndruar 4-5 dite me gjithë djalin në Spitalin modular megjithëse potencoi se shumicën e kohës kishte qëndruar dhe në ambientin e jashtëm të Spitalit që të mos bëhet e bezdisshme gjithë kohës brenda modularit. Tha se jam kujdesur për djalin ta ushqej ta pastroj, ta mbathë dhe kam dalë jashtë hapësirave. Ajo shtoi se nuk ishte penguar nga personeli qe t’i qëndroje afër të birit.

Ndërkohë një tjetër dëshmitaret e natës së 8 shtatorit 2021 tha se kishte qëndruar për 28 ditë me radhë me bashkëshortin brenda modularit të Tetovës dhe se askush nuk e kishte ndaluar as të hynte as te dilte e të qëndronte për tu kujdesur për bashkëshortin e saj. Ajo deklaroi se nuk ka pasur roje te dera e modularit. Në dhomën 5 ku ka qëndruar së bashku me bashkëshortin thotë se ka pasur edhe disa familjarë tjerë të pacientëve të cilët kane qëndruar rregullisht aty.

“Momentin kur pash zjarrin shkova ta shpëtoj burrin po dikush e mbylli derën dhe ndërsa ajo u shkri nga zjarri. Burrin e hoqa nga krevati dhe e lëshova poshtë sepse nuk munda të arrij ta shpëtojë, ndërsa unë kërceva nga dritarja. Askush nuk na thonte mos hyni, sepse pacientët kishin nevoje për ne”, tha dëshmitarja.