Shefi i Wagnerit: Një njësi e ushtrisë ruse u arratis nga fushëbeteja pranë Bakhmutit

Yevgeny Prigozhin, themeluesi i kompanisë private ushtarake ruse Wagner, njoftoi dje se grupi i tij mercenar ka filluar të marrë municion.

“Sipas të dhënave paraprake, ne po fillojmë të marrim municione”, tha ai dje në një audio mesazh të lëshuar nga zëdhënësit e tij.

Ai shtoi se në Bakhmut po zhvillohen luftime “të ashpra”, por pohoi se forcat e tij po bëjnë përparim, shkruan Kyiv Post.

Sidoqoftë, Prigozhin publikoi një regjistrim të ri herët këtë mëngjes.

“Për të mos i prishur askujt pushimet, videoja e plotë që tregon gjendjen e municioneve do të shfaqet pikërisht në orën 10:40, pasi të përfundojë parada e fitores. Dhe meqë është ora 03:30 e mëngjesit, kemi ende kohë – kush e di, ndoshta marrim municionet. Atëherë nuk do t’i tregojmë”, tha ai.

Në fund ka publikuar videon me të cilën kërcënohet. Në të, ai akuzoi një njësi ushtarake ruse se po ikën nga pozicionet e saj pranë Bakhmutit në lindje të Ukrainës, ku aktualisht po zhvillohen luftimet më të ashpra.

“Sot, një njësi e Ministrisë së Mbrojtjes u arratis nga një nga krahët tanë… duke lënë një front të ekspozuar”, tha Prigozhin.

Ai përsëriti premtimin e tij se luftëtarët e tij do të largohen nga Bakhmuti nëse ushtria ruse nuk do të dorëzonte më shumë municion.

Përveç kësaj, ai vuri në dyshim aftësinë e Kremlinit për të mbrojtur vendin ndërsa Ukraina përgatitet për një ofensivë pranverore.

“Pse vendi nuk është në gjendje të mbrojë vendin e tij”, pyeti ai, duke shtuar se Ukraina po godiste me sukses rajonet kufitare të Rusisë.