Shkëndija forcohet me reprezentuesin e Shqipërisë

Skuadra e Shkëndijës ka firmosur kontratë me reprezentuesin e përkohshëm të Shqipërisë, Kamer Qaka. 25 vjeçari i lindur në Pejë karrierën e ka nisur te Valerenga, ndërsa në Norvegji është paraqitur edhe me Raufoss, Hønefoss, Kristiansund dhe Kongsvinger. Në vitin 2017 për herë të parë transferohet në Rumani, fillimisht te Politehnica Iasi, për të bërë më pas në vitin 2018 lëvizjen e madhe drejt Steaua Bukuresht. Universitatea Craiova është skuadra e tretë rumune ku ka luajtur Qaka, për të vendosur tashmë të luajë në elitën e futbollit tonë me skuadrën e Shkëndijës. Qaka ishte anëtarë i rregullt i përfaqësueseve U17, U18 dhe U19 të Norvegjisë, mirëpo në kategori të seniorëve vendosi të përfaqësojë Shqipërinë, duke regjistruar 4 paraqitje me kombëtaren kuqezi në kohën kur seleksionues ishte Kristian Panuçi.

“Është shumë ndjenjë e mirë të jem pjesë e Shkëndijës. Kam dëgjuar shumë gjëra të mira për këtë klub, se është skuadër serioze. Mezi pres të luaj për ekipin për të treguar edhe potencialin tim. E dij se Shkëndija është shumë e fortë në kampionat aq sa kam pa unë, por edhe në Europë kam ndjek disa ndeshje shumë të mira dhe janë përballur me skuadra të njohura. Shpresoj që edhe unë do të mund të ndihmoj skuadrën për të arritur edhe më shumë. Kam dëgjuar se Shkëndija luan futboll shumë ofenziv, ashtu si kam qejf edhe unë me shku përpara gjithmonë. Serioziteti i klubit më bëri të pranoj ofertën. Mendoj se më me rëndësi është të paraqitem mirë për klubin, pastaj të shofim. Gjithë futbollistët duan të luajnë për kombëtaren, jam shqiptar dhe gjëja më e madhe është të luaj për kombëtaren. Nuk kam qejf të flas shumë për veten, më shumë dua të flas në terren. Shpresoj përfundon kjo puna e pandemisë, të kthehen ‘Ballistët’ të na shohin dhe të na përkrahin dhe besoj se bashkë do të ecim mirë”, u shpreh Kamer Qaka në prononcimin e tij të parë si futbollist i Shkëndijës.

Ndryshe Kamer Qaka bëhet përforcimi i katërt i Shkëndijës në këtë merkato, ndërsa menjëherë pas firmosjes së kontratës i njëjti ka udhëtuar drejt Turqisë ku do të bashkohet me grupin në fazën përgatitore në Antalia, aty ku Shkëndija e Ernest Gjokës sot zhvilloi takimin e parë kontrollues kundër ukrainasve të Zorya Luhansk (1:1).