Shqipëri, Astrit Patozi jep dorëheqjen si kryetar i Bindjes Demokratike

Kryetari i partisë Bindja Demokratike, Astrit Patozi ka dhënë dorëheqjen si drejtues kësaj force politike pas rezultatit zhgënjyes që mori në zgjedhjet parlamentare të 25 prillit.

- Advertisements -

Z. Patozi në një reagim në rrjetet sociale thotë se merr përgjegjësinë e këtij rezultati dhe për këtë arsye largohet nga drejtimi i partisë së themeluar prej tij në prill 2019.

“Duke falënderuar edhe një herë kandidatët, mbështetësit dhe të gjithë votuesit e Bindjes Demokratike në zgjedhjet e 25 prillit, kam vendosur të marrë të gjitha përgjegjësitë për mosarritjen e objektivave tona elektorale dhe të dorëhiqem nga drejtimi i partisë”, deklaron ai.

Astrit Patozi shton se “askush prej nesh nuk kishte keqkuptimin se rezultati do të arrihej me një të rënë të sëpatës dhe asnjëherë nuk e kishim menduar se Bindja Demokratike ishte projektuar për vetëm një palë zgjedhje”, ndaj inkurajon që pasuesit të vazhdojnë betejat politike.

“Dorëheqja ime është një akt moral përgjegjësie, por kurrsesi dorëzim. E kemi shpallur që në ditën e parë të themelimit se Bindja Demokratike nuk është një njeri, as një grup personash, e aq më pak pronë apo ndërmarrje biznesi e dikujt”, shprehet z. Patozi.

Në zgjedhjet parlamentare të 25 prillit, Bindja Demokratike mori në të gjithë vendin 8 238 vota ose 0.52% në rang kombëtar. Astrit Patozi ishte kandidat për deputet në Qarkun e Tiranës, ku BD siguroi në total 2 469 vota ndërsa vota preferenciale kishte 830.

Dorëheqja e z. Patozi është e dyta pas largimit të Jozefina Topallit nga drejtimi i partisë Lëvizja për Ndryshim. Znj. Topalli e cila mori pjesë për herë të parë në një garë elektorale me partinë e porsa formuar, u largua pas rezultatit zhgënjyes. Lëvizja për Ndryshimi mori 7 049 vota ose 0.45% në rang kombëtar.

LEXO EDHE:

Back to top button