Skandal diplomatik në BE? Kontakt i fshehtë me Kremlinin ndez reagime
Presidenti i Këshillit Evropian, Antonio Costa, i është drejtuar Kremlinit në një përpjekje për të angazhuar Presidentin rus Vladimir Putin në bisedime për t’i dhënë fund luftës në Ukrainë, raportoi Reuters.
Sipas burimeve të njohura me situatën, këshilltari kryesor i Kostës pati të paktën dy biseda telefonike me homologun e tij në Moskë. Qëllimi i këtyre kontakteve ishte përgatitja e terrenit për negociata më serioze dhe konkrete në të ardhmen.
Zëdhënësja e Antonio Costas nuk pranoi të komentonte mbi këtë informacion, dhe zëdhënësi i Putinit, Dmitry Peskov, nuk iu përgjigj pyetjeve të gazetarëve.
Costa më parë ka njoftuar bisedime me Moskën.
Costa, një ish-kryeministër portugez, i cili tani kryeson organin e përbërë nga udhëheqësit e njëzet e shtatë shteteve anëtare të Bashkimit Evropian, ka folur më parë për mundësinë e hapjes së bisedimeve me Moskën kur të vijë momenti i duhur.
“Ne duhet, në momentin e duhur, të flasim me Rusinë për të zgjidhur çështjet tona të përbashkëta të sigurisë”, u tha Costa gazetarëve muajin e kaluar.
Kaia Kallas paralajmëron për kurthin rus
Megjithatë, çdo përpjekje për të krijuar kanale sekrete me Moskën ose për të emëruar një të dërguar të posaçëm evropian për të ndërmjetësuar bisedimet vazhdon të shkaktojë përçarje dhe polemika të mëdha brenda Unionit.
Shefja e diplomacisë evropiane, Kaia Kallas, një ish-kryeministre estoneze e njohur për qëndrimin e saj të ashpër ndaj Moskës, paralajmëroi muajin e kaluar se Evropa rrezikon të bëjë pikërisht atë që dëshiron Rusia nëse fillon të diskutojë emërimin e një të dërguari të posaçëm për negociatat me Putinin.
“Ata tashmë po zgjedhin se kush u përshtatet dhe kush jo – le të mos biem në atë kurth”, tha Kallas.
Evropa dëshiron të marrë iniciativën nga Uashingtoni
Lëvizja diplomatike u njoftua përpara një samiti dy-ditor të liderëve të Bashkimit Evropian që fillon nesër në Bruksel, ku do t’u bashkohet atyre edhe Presidenti ukrainas Volodymyr Zelensky.
Marrëdhëniet diplomatike midis Brukselit dhe Moskës u ndërprenë plotësisht pas pushtimit rus të Ukrainës në vitin 2022. Që atëherë, janë regjistruar vetëm kontakte të rralla dhe të rastësishme dypalëshe.
Ndërprerja e ka lënë Evropën të lënë mënjanë në bisedimet diplomatike të Uashingtonit për t’i dhënë fund luftës. Kritikët e veprimit të Kostës paralajmërojnë se çdo takim me Putinin do të ishte një fitore e madhe propagandistike për Rusinë.
