Talat Xhaferi, Blerim Bexheti, Sadulla Duraku dhe Musa Xhaferi do të jenë anëtarë të Këshillit të BDI-së – Kongresi i së shtunës pati edhe pakënaqësi

Gazetar: Suad Bajrami

Talat Xhaferi, Musa Xhaferi, Blerim Bexheti dhe Sadulla Duraku nuk u zgjodhën anëtarë të Këshillit të Përgjithshëm të BDI-së në Kongresin e së shtunës, megjithatë sipas statutit të partisë ata do të vazhdojnë të jenë pjesë e organit më të lartë partiak, derisa ta ushtrojnë detyrën e deputetit. Sipas Statutit, ata do të ketë edhe të drejtë vote, megjithatë nuk do të kenë të drejtë të zgjidhen në funksione partiake. Sipas funksionit pjesë e Këshillit të Përgjithshëm do të jenë edhe kryetari i Çashkës, Suat Shaqiri. Gjithashtu, pjesë e Këshillit duhet të jenë edhe kryetarët e Forumit Rinor dhe Forumit të Gruas, por edhe krerët e degëve.

Pos tyre, në Këshillin e Përgjithshëm do të ketë edhe 110 anëtarë të zgjedhur, të cilët për dallim prej anëtarëve sipas funksionit, kanë mundësi të ushtrojnë poste në organet partiake. 28 anëtarë janë figura që vijnë nga pozicionet e larta partiake të përbërjes së kaluar, 10 figura janë eksponentë që kanë shërbyer nëpër pozita të larta gjatë përbërjeve të kaluara, ndërsa 72 anëtarë nuk kanë qenë figura mjaftë të ekspozuara në opinion.

Ndërkohë Kryesia e Këshillit të Përgjithshëm si organ ekzekutiv që veç tjerash përpilon listën e kandidatëve për deputetë, por edhe cakton bartës të funksioneve tjera shtetërore, si dhe personin i cili do të udhëheq me punët financiare të partisë, do të përbëhet prej 25 anëtarëve.

13 prej tyre janë figura që nuk kanë ushtruar funksione të larta partiake në të kaluarën. 10 anëtarë janë figura që kanë qenë në mandatin e kaluar në funksione të larta partiake, ndërsa 2 janë të përbërjeve të kaluara dhe eksponentë të partisë.

Tabela 2

Lidhur me emrat që u zgjodhën në Kongres, pati reagime edhe brenda BDI-së, të cilët shprehën pakënaqësi.

Kryetari i Degës së Shuto Orizares, Ilaz Leskovica në një bisedë të shkurtër telefonike për Alsat sqaroi se mospajtimet janë kryesisht nga strukturat e BDI-së në Shkup të cilat vlerësojnë se nuk janë përfaqësuar mjaftueshëm. Sipas tij, një pjesë e emrave që në opinion u theksuan si figura të reja, në fakt janë familjarë apo të afërm të funksionarëve paraprak. Leskovica, tha se do të insistojnë brenda partisë që Shkupi të marrë pjesën e merituar, ndërsa theksoi që kjo pakënaqësi tani për tani nuk ka plan të formalizohet në ndonjë organizim siç ishte “Grupi i Zjarrit”.

Valmir Aziri, i cili gjithashtu shprehu pakënaqësi lidhur me punimet e Kongresit për Alsat sqaron se kritika e tij ka të bëjë me mungesën e llogaridhënies për zgjedhjet e kaluara lokale ku BDI humbi udhëheqjen e shumicës së komunave. “Sa i përket termave apo etiketimeve të tipit “Grupi i Zjarrit 2”, mendoj se ato janë emërtime jo serioze dhe nuk i shërbejnë debatit politik”.

Për kritikat e ashpra, Alsat kontaktoi edhe ish zëvendësministren e Arsimit, Lindita Qazimi, megjithatë, ajo theksoi që nuk ka çfarë të shtuar më shumë.

Kritika pati edhe Abduselam Selami, megjithatë Ali Ahmeti sot në brifing me gazetarët ka theksuar që Selami i ka kërkuar falje dhe vazhdon në BDI.

Alsat tentoi të kontaktojë edhe Festim Halilin, i cili kishte kritika për mungesë meritokracie, megjithatë ai nuk iu përgjigj thirrjeve tona telefonike./ Alsat.mk