Tragjedi në Sellcë të Tetovës, 45 vjeçar me probleme psikike ka vrarë nënën e tij

Gazetar: Bashkim Sulejmani

Një rast i rëndë ka zgjuar mëngjesin e sotëm banorët e fshatit Sellcë të Tetovës. Djali 45 vjeçar me inicialet U.D ka vrarë nënën e tij 73 vjeçe, shkruan Alsat.

Ndërsa e ëma ishte në oborr, 45 vjeçari me sëpatë ia ka prerë kokën dhe sipas dëshmitarëve më pas ka dalë në lagje. Personi U.D ka vuajtur nga problemet psikike.

“Banorët e fshatit, kanë refuzuar që ta komentojnë rastin në fjalë. Mbetet një tragjedi e rëndë e fshatit dhe familjes thonë ata, ndërsa akuzojnë institucionet se, nuk merren me trajtimin si duhet të këtyre rasteve”.

Policia e Tetovës ka njoftuar se menjëherë pas kryerjes së krimit, autori është arrestuar.

“Sot rreth orës tetë e tridhjetë, pjesëtarë të policisë së Tetovës, kanë privuar nga liria personin U.D. 45 vjeç nga fshati Sellcë i Tetovës, i cili, paraprakisht ka kryer vrasjen e nënës së tij, 73 vjeçares N.D., nga po i njëjti fshat. Rastin e ka kryer me një mjet të mprehtë. Hetime në vendin e ngjarjes ka kryer prokurori publik i prokurorisë themelore të Tetovës ndërsa trupi është dërguar për autopsi”, deklaroi Fatmir Rexhepi. Zëdhënës i Policisë së Tetovës.

45 vjeçari U.D me vite të tëra është trajtuar në Spitalin Psikiatrik në Shkup, nga ku është larguar vet një muaj më parë.

“Bëhet fjalë për pacient që trajtohet në spitalin psikiatrik që nga viti 2009,. Trajtimi në fillim ka qenë me ndërprerje, ndërsa nga viti 2017 në kontinuitet deri më 21 Shkurt, të këtij viti ka qenë pacient në kontinuitet që është trajtuar tek ne. Fjala është për diagnozë të pashërueshme dhe që ka nevojë për trajtim të vazhdueshëm. Pacienti e ka lëshuar vetë spitalin në 21 shkurt të vitit 2022. Shërbimet tona kanë vënë kontakt menjëherë me vëllain e tij i cili ka dhënë informatë se pacienti ndodhet në shtëpi dhe ka kërkuar që pacienti të mbetet në shtëpi dhe atë ditë shërbimet tona kanë bë ç’lajmërim të pacientit”, tha Qamil Kovaçi, Drejtor i Spitalit Psikiatrik Shkup.

Rasti i Sellcës, është i dyti me radhë ku pacientë të lëshuar nga spitali psikiatrik sulmojnë familjarët, pas atij të dy viteve më parë që ndodhi në Gostivar./Alsat.mk

LEXO EDHE:

Back to top button