Arsovska duhet të prezantojë planin për dalje nga kriza

Kryetarja e Shkupit, Danela Arsovska, sot pritet në takim me koordinatorët e grupeve këshilldhënëse për të prezantuar planin për daljen nga kriza në kryeqytet. Takimin e koordinatorëve e caktoi kryetari i Këshillit të Qytetit të Shkupit, Trajko Sllaveski.

Pritjet e njerëzve të parë të grupeve këshillimore janë që ajo të prezantojë një plan për gjendjen në “Higjienën Komunale” dhe higjienën në kryeqytet, por edhe për Ndërmarrjen e Transportit Publik dhe si të tejkalohet problemi me autobusët në Shkup. Megjithatë, thonë grupet këshilldhënëse, mbetet të shihet se me çfarë plani do të dalë Arsovska në takimin e sotëm, i cili duhet të fillojë në ora 11:00.

Mbrëmë, në një intervistë televizive, e pyetur nëse sot është afati kur do t’i paraqesë propozimet për tejkalimin e problemeve, Arsovska tha se është absurde të flitet për afate, sepse në vend nuk mund të zgjidhet asgjë për tri ditë. Ajo tha se në takimin me kryeministrin Hristijan Mickoski të hënën në Qeveri ka ofruar zgjidhje afatshkurtra, afatmesme dhe afatgjata.