BE-ja kërkon lundrim të lirë në Ngushticën e Hormuzit, Kallas: Nuk mund të ketë tarifa

Përfaqësuesja e Lartë e BE-së, Kaja Kallas, bëri thirrje për lundrim të lirë në Ngushticën e Hormuzit, ndërsa si Shtetet e Bashkuara ashtu edhe Irani pohojnë se e kontrollojnë atë. Irani dhe SHBA-ja janë thuajse në gjysmën e periudhës 60-ditore të një marrëveshjeje të përkohshme, e cila supozohej të krijonte kushtet për bisedime drejt një përfundimi të përhershëm të luftës. Në vend të kësaj, situata ka degjeneruar në një seri sulmesh mbi ngushticën dhe të ardhmen e saj, duke shqetësuar liderët botërorë se lufta me Iranin mund të rikthehet plotësisht. Kallas tha se Memorandumi i Mirëkuptimit është në fuqi, por “nuk respektohet realisht”. Duke folur përpara takimit të ministrave të punëve të jashtme të BE-së, ajo tha se Ngushtica e Hormuzit duhet të hapet dhe se liria e lundrimit duhet të respektohet.

“Memorandumi i Mirëkuptimit është aty, por nuk po mbahet realisht. Dhe ne po diskutojmë se çfarë mund të bëjmë më shumë, çfarë lloj mesazhesh mund të dërgojmë, që Ngushtica e Hormuzit duhet të hapet, që liria e lundrimit duhet të respektohet. Nuk mund të ketë as taksa dhe as tarifa për lundrimin atje,” tha Kaja Kallas, Përfaqësuese e Lartë e BE-së .