Britania hap një bazë ushtarake në veri të Norvegjisë

Ushtria britanike ka njoftuar se do të hapë një bazë ushtarake në veriun e Norvegjisë për të forcuar aftësitë e NATO-s në Arktik, mes shqetësimeve për pushtimin rus të Ukrainës.

Norvegjia e cila kufizohet me Rusinë, refuzon të pranojë baza të përhershme për ushtarët e huaj, Kampi Viking do të hapet për dhjetë vjet në veri të Tromsø dhe do të strehojë komando që do të trajnohen për të luftuar në kushte ekstreme të ftohta.

“Vendndodhja e kampit është ideale për parandalimin e kërcënimeve në rajon dhe i lejon Britanisë të reagojë shpejt nëse është e nevojshme për të mbrojtur krahun verior të NATO-s dhe aleatin e saj të ngushtë, Norvegjinë”, shpjegoi në një deklaratë Ministria Britanike e Mbrojtjes.

Baza, e vendosur pranë instalimeve ushtarake norvegjeze, do të ruajë praninë e komandove britanike në zonë, ku rreth 1000 morën pjesë në stërvitjet ushtarake këtë dimër.

Nga ana e saj, Ministria e Mbrojtjes norvegjeze sqaroi se objekti ishte një qendër e vjetër stërvitore që ishte përdorur fillimisht nga vendet aleate dhe më pas nga marinsat holandezë. “Kampi është norvegjez dhe financohet nga Norvegjia”.

Një anëtare themeluese e NATO-s, Norvegjia ka refuzuar që nga viti 1949 të pranojë baza të përhershme ushtarake të huaja në tokën e saj në kohë paqeje, në mënyrë që të mos provokojë Rusinë fqinje, por rregullisht pret trupat aleate për t’i lejuar ata të stërviten për luftime në të ftohtë.

Mbretëria e Norvegjisë, e cila ndan një kufi 198 km me Rusinë në Veriun e Madh, ka furnizuar Ukrainën me pajisje ushtarake, duke përfshirë sisteme artilerie dhe municione, për të ndihmuar vendin të mbrohet kundër një pushtimi rus.