Çfarë po ndodh me naftën? Marrëveshja SHBA-Iran ul ndjeshëm çmimet

Çmimet e naftës ranë ndjeshëm në tregjet ndërkombëtare sot, duke rënë nën 80 dollarë për fuçi, pasi Shtetet e Bashkuara dhe Irani arritën një marrëveshje mbi një kornizë negociatash për t’i dhënë fund luftës dhe njoftuan hapjen e Ngushticës së Hormuzit.

Marrëveshja u konfirmua edhe nga Këshilli i Lartë i Sigurisë Kombëtare i Iranit, i cili njoftoi se pas nënshkrimit të dokumentit, do të fillojë procesi i hapjes së ngushticës.

Sipas agjencisë së lajmeve Tasnim të Iranit, memorandumi përfshin një moratorium 60-ditor për mbledhjen e tarifave për anijet që kalojnë nëpër Ngushticën e Hormuzit. Pas afatit, Irani planifikon të vendosë tarifa për shërbimet detare, ndërsa Shtetet e Bashkuara presin që ngushtica të mbetet e hapur pa tarifa shtesë.

Zëvendëspresidenti i SHBA-së, J.D. Vance, tha se këto çështje do të shqyrtohen në negociatat e ardhshme teknike.