Fillon fushata në Greqi, më 21 maj zhvillohen zgjedhjet e përgjithshme
Fillon fushata në Greqi, më 21 maj zhvillohen zgjedhjet e përgjithshme
Menjëherë sapo kryeministri Mitsotakis i ka kërkuar presidentes shpërndarjen e parlamentit dhe mbajtjen e zgjedhjeve të përgjithshme në 21 maj, ka filluar edhe zyrtarisht fushata elektorale e partive greke
“Asnjë qeveri që nga vendosja e demokracisë nuk është përballur me kaq shumë pengesa. E megjithatë, ne i kapërcyem të gjitha. Kufijtë tanë mbetën të pathyeshëm. Dhe me një program gjigant që kaloi 50 miliardë euro, u mbështetën familjet, bizneset dhe vendet e punës“- tha Mitsotakis.
“Ky regjim do të bëjë gjithçka për t’u kapur pas kolltuqeve të pushtetit, për të parandaluar ndryshimin politik që po vjen. Nuk do t’ia dalë, por duhet ta dini: Provokimet, shantazhet, ryshfetet, lajmet e rreme, sondazhet e rreme edhe dezertimet do të përdoren në ditët që vijnë nga regjimi i Mitsotakis”- tha Tsipras.
Rreth 430,000 të rinj nga 17 deri në 21 vjeç do të votojnë për herë të parë në zgjedhjet e 21 majit dhe vlerësohet se 40% e tyre shprehen të pavendosur se kë parti do votojnë. Ministria e Brendëshme tregon në faqen e saj zyrtare precedurën se si mund të gjejnë zgjedhësit e rinj qendrën ku votojnë.
Në gati 9.9 milion votues 51.3% të elektoratit janë femra dhe 48.4% meshkuj. Qytetarët votojnë me kartë identiteti ose pasaportë ose patentë automjeti ose kartelë shëndetësore individuale të të gjitha fondeve të sigurimit.
Zgjedhjet e 21 majit do të jenë të parat në të cilat mund të votojnë nga vendbanimi i tyre rreth 22000 grekë që jetojnë jashtë vendit dhe që plotësojnë kushtet e vendosura me projektligj të qeverisë./Top Channel