Irani thotë se ngushtica e Hormuzit është një vijë e kuqe, SHBA-të nuk do ta kontrollojnë kurrë atë

Irani e ka shpallur Ngushticën e Hormuzit një vijë të kuqe të paprekshme, duke paralajmëruar se nëse Donald Trump e zbaton kërcënimin e tij për të bombarduar infrastrukturën iraniane, Irani do të sulmojë të gjithë infrastrukturën në të gjithë Gjirin Persik.

SHBA-të e kanë sulmuar Iranin për të pestën ditë radhazi, pasi një armëpushim i brishtë u prish dhe rivendosi një bllokadë detare të porteve iraniane, me të cilën Uashingtoni po bën presion për rihapjen e Ngushticës së Hormuzit. Pas sulmeve të mbrëmshme, kryenegociatori i Iranit, Mohammad Bagher Qalibaf, tha se “Irani është në një luftë themelore dhe ekzistenciale me Amerikën”.

“Ngushtica e Hormuzit është një vijë e kuqe për Iranin, mbi të cilën ai ka kontroll të fortë. Amerikanët menduan se duke sulmuar disa nga bazat tona, ata mund ta merrnin kontrollin e saj. Megjithatë, Republika Islamike e Iranit ka aftësinë të kontrollojë Ngushticën e Hormuzit nga çdo pikë në territorin e saj dhe kjo çështje nuk varet kurrë nga brigjet dhe ishujt”, tha zëdhënësi ushtarak iranian, Mohammad Akramini.

Trump këtë javë kërcënoi të shkatërrojë termocentralet dhe urat iraniane nëse Irani nuk kthehet në bisedime.

“E vetmja mënyrë për të rihapur Ngushticën e Hormuzit është që Shtetet e Bashkuara t’i përmbahen memorandumit të mirëkuptimit të nënshkruar në qershor dhe të zbatojnë rregulloret iraniane mbi transportin detar”, tha Akraminia.

Irani tha se sulmoi bazat amerikane në Jordani, Kuvajt dhe Bahrein sot në përgjigje të sulmeve të fundit të SHBA-së, të cilat zgjatën gjashtë orë.