Klinton: Nuk isha në dijeni të krimeve të Epsteinit

Ish-presidenti amerikan Bill Klinton u distancua nga Xhefri Epstein në dëshmitë me dyer të mbyllura me ligjvënësit. Klinton i tha komisionit se ai i kishte dhënë fund marrëdhënies me Epsteinin vite para se ai të pranonte fajësinë në vitin 2008 për nxitje prostitucioni nga një vajzë e mitur. Ish-presidenti demokrat tha se e kujtoi për herë të parë takimin me Epstein kur fluturoi me avionin privat të financierit në vitin 2002 për punën humanitare të familjes Klinton. Tha se ndanë rrugët vitin tjetër pasi ndjeu se Epstein nuk ishte thellësisht i interesuar për punën humanitare.

“Kur mësuat për herë të parë për krimet e Xhefri Epstein?”, pyeti një Anëtar i Komitetit.

“Mendoj se në vitin 2008 kur ai u ndoq penalisht. Nuk kishte asgjë që pashë kur isha pranë tij që më bëri të kuptoja se ai po trafikonte gra”, tha Bill Klinton, Ish president i SHBA-së.

Epstein e vizitoi Shtëpinë e Bardhë disa herë gjatë presidencës së Klintonit dhe kishte foto të tyre duke shtrënguar duart. Klinton u tha ligjvënësve se nuk i kujtonte ato ndërveprime. Ndërkohë Hillari Klinton i tha komisionit se ajo as nuk kujtonte ta kishte takuar Epsteinin. Të dyja intervistat me dyer të mbyllura para Komitetit Mbikëqyrës të Dhomës së Përfaqësuesve u morën nën betim javën e kaluar. Dëshmia e Klintonëve erdhi ndërsa ligjvënësit po përpiqeshin të përmbushnin kërkesat për një llogaridhënie për Epstein, i cili vrau veten në vitin 2019 në Nju Jork ndërsa përballej me akuza për trafikim seksual dhe abuzim me vajza të mitura. Persona me status të lartë në të gjithë botën janë detyruar të japin dorëheqjen për shkak të zbulimeve rreth marrëdhënieve të tyre me Epstein. /Alsat.mk