Kosovë/ Tension në Kuvend mes PDK-së e LVV-së

Deputeti i PDK-së, Ferat Shala ka dalë në foltoren e Kuvendit në momentin kur shefja e Grupit Parlamentar të LVV-së, Mimoza Kusari-Lila vendosi të dalë dhe të bëjë një replikë.

Në të njëjtin moment është ngritur edhe deputeti i LVV-së, Salih Zyba.

Shala ia tërhoqi mikrofonin Kusari-Lilës, teksa deputeti Zyba u ngrit që ta “mbronte” shefen e tij.

Nënkryetarja e Kuvendit, Saranda Bogujevci iu kërkoi vazhdimisht deputetit Shala dhe Zyba që të ulen në vendet e tyre.

“Mos më detyroni të thërras sigurimin. Sigurimi tani në sallë dhe i largoni të dy deputetët që i përmenda me emër. E kam të pamundshme që në secilën seancë burrat të ngritën në këmbë dhe më tregojnë mua sesi ta bëjë interpretimin e rregullores. Mjaft më”, tha Bogujveci.

Pasi që sigurimi nuk hyri në sallë, Bogujevci tha se deputetët në fjalë nuk do të kenë të drejtë fjale.