Legjenda e Hollivudit, Val Kilmer, ka vdekur në moshën 65-vjeçare

Aktori po luftonte me sëmundjen që nga viti 2014, por pas kimioterapisë dhe operacionit në trake, ai arriti të rikuperohej, ndonëse ia pakësoi ndjeshëm aftësitë vokale.

I lindur në Los Anxhelos në vitin 1959, Kilmer ishte një nga studentët më të rinj të pranuar ndonjëherë në programin prestigjioz të aktrimit të Juilliard. Ai filloi karrierën e tij në teatër dhe në fund të viteve 1980 fitoi popullaritet me rolet në komeditë “Top Secret!” (“Top sekret!”) dhe “Gjeniu i vërtetë”. Ai arriti famë botërore me rolin e tij si Iceman në “Top Gun”, ku takoi gruan e tij të ardhshme Joan Whaley , me të cilën pati dy fëmijë. Çifti u divorcua në vitin 1996.

Regjisori i madh Oliver Stone ia besoi rolin e Jim Morrison në filmin biografik “The Doors”, ndërsa Kilmer u bë i njohur edhe me rolet e Elvis Presley në “True Romance” dhe Doc Holliday në western “Tombstone”. Performanca e tij e jashtëzakonshme në këtë film i dha atij mundësinë për të portretizuar Bruce Wayne në Batman Forever, i cili konsiderohet kulmi i karrierës së tij.

Pas filmave më pak të suksesshëm The Saint, The Island of Dr. Moreau dhe Red Planet, Kilmer iu drejtua projekteve më të vogla filmike.

Në vitin 2005, ai u shfaq së bashku me Robert Downey Jr. në komedinë kriminale Kiss Kiss Bang Bang, dhe në 2012, ai luajti rolin e Mark Twain në shfaqjen solo Qytetari Twain. Në vitin 2017, ai u shfaq në dramën muzikore të Terrence Malick “Song to Song”. Pas një pauze të gjatë, në vitin 2022 ai riprodhoi rolin e Iceman në “Top Gun: Maverick”, ku personazhi i tij u prezantua si komandanti i Flotës së Paqësorit të SHBA.

Në vitet e fundit të jetës së tij, Kilmer ishte gjithnjë e më aktiv në politikë. Në vitin 2009, ai tha se po mendonte të kandidonte për guvernator të New Mexico, ku jetonte. Ai ishte i pranishëm në mitingjet për fushatën presidenciale të Ralph Nader në 2008, dhe në vitin 2013 ai loboi për përjashtime fetare nga Obamacare.