Manastirliu mesazh qytetarëve: Ta bëjmë maskën zakon të përditshëm

Ministrja e Shëndetësisë dhe Mbrojtjes Sociale të Shqipërisë, Ogerta Manastirliu u ka drejtuar një mesazh qytetarëve për mbajtjen e maskave mbrojtëse në të gjitha ambientet për të ndihmuar sistemin shëndetësor dhe frenuar përhapjen e COVID-19.

Manastirliu thotë se pavarësisht përgatitjes dhe punës së përditshme në betejën me këtë virus të rrezikshëm, përgjegjësia është edhe individuale për parandalimin e infeksionit. Manastirliu ka bërë apel që qytetarët të vendosin barrierat mbrojtëse për të mbrojtur shëndetin e tyre.

“Të frenojmë virusin, të evitojmë sa mundemi format e rënda në reanimacion dhe fatalitetet. Pavarësisht kapaciteteve spitalore dhe përgatitjes që kemi bërë dhe po bëjmë për t’u përballur me virusin, është jeta e shqiptarëve që ne duhet të mbrojmë, ndaj secili nga ne ka detyra për të përmbushur në këtë betejë. Të ndihmojmë veten dhe të ndihmojmë njëri-tjetrin, të mbrojmë shëndetin duke vendosur barrierat mbrojtëse”, thekson Manastirliu në mesazhin e saj.

Prej ditës së enjte (15 tetor) në Shqipëri, maskat-barrierat mbrojtëse do të vendosen me detyrim në çdo ambient të mbyllur dhe të hapur, si një nga masat kryesore që frenon përhapjen e infeksionit. /ATSH/