Апел: Родителите да ги вакцинираат децата против морбили

Нема релевантни докази дека вакцината против мали сипаници може да предизвика аутизам. Може само да спаси животи, велат специјалистите од оваа област кои ги повикуваат родителите да ги вакцинираат своите деца од една до шест години и да не ги изложуваат на ризик од морбили. Лекарите специјалисти и епидемиолози предупредуваат на малиот број вакцинирани и не ја исклучуваат можноста од појава на епидемија.

Злате Мехмедовиќ, од Комисијата за заразни болести, вели дека сите дезинформации што кружат за овие вакцини се темелат на лажна студија објавена пред 25 години во која се тврдело дека МРП вакцините предизвикуваат аутизам кај децата.

На државно ниво 70 проценти од населението е вакцинирано против морбили. Тоа е далеку помалку од потребните 95 проценти за колективен имунитет. Во 2019 година С Македонија се соочи со агресивна епидемија кога од болеста се заразија речиси 2.000 лица.

Ајнур Бафќари