Министерството за јавно здравје во американската сојузна држава Илиноис објави дека еден човек починал од беснило, што е прв таков случај во државата од 1954 година, пишува „Дејли мејл“.
Човекот имал осумдесет години, живеел во округот Лејк и починал во вторникот, еден месец откако се разбудил кон средината на август и нашол лилјак прикачен на вратот.
Американските центри за контрола и превенција на болести ја потврдија дијагнозата по лабораториските тестови и соопштија дека мажот почнал да покажува симптоми карактеристични за беснило, вклучувајќи болки во вратот, главоболки, тешкотии при контрола на екстремитетите и говорот.
Беснилото има една од највисоките стапки на смртност споредено со која било друга болест, бидејќи буквално 100 проценти од пациентите кои покажуваат симптоми умираат во рок од неколку недели. Иако постојат вакцини и третмани кои можат да спречат смрт, тие треба да се дадат веднаш по изложувањето на болеста. Штом се појават симптомите, обично е предоцна за тоа.
Случаите на беснило кај луѓето се ретки, три се пријавуваат во Соединетите држави секоја година, но изложеноста на оваа болест е честа појава и се проценува дека 60.000 Американци примаат превентивен третман секоја година.
Неодамна, имаше информации од Енкориџ, Алјаска, дека група видри одеднаш почнала да ги напаѓа минувачите, а како можна причина е наведено беснило. Според официјалните лица, деветгодишно момче примило вакцина против беснило откако било нападнато од видра во близина на езерото Отис. Неговата мајка ги предупреди локалните жители да се држат подалеку од езерото.
