Унгарија би била подготвена да стави вето на санкциите на Европската унија врз руската нафтена индустрија доколку мерките ја ограничат способноста на Будимпешта да увезува енергија, според висок функционер во владата на премиерот Виктор Орбан, пренесува Блумберг.
Европската комисија треба да предложи забрана на руската нафта до крајот на годината поради нејзината војна во Украина, а дотогаш постепено ќе се воведуваат ограничувања на увозот, се додава во текстот на Блумберг.
Унгарија, која во голема мера се потпира на руската енергија, беше меѓу најгласните во противењето на проширувањето на санкциите. Владата на Орбан предупреди на сериозна штета на економијата на Унгарија без пристап до руската нафта и природен гас.
„Бидејќи таквите одлуки бараат едногласност, нема смисла комисијата да предлага санкции кои влијаат на природниот гас и суровата нафта што би ги ограничиле унгарските набавки“, изјави во неделата HirTV министерот за кабинет Гергели Гуљас.
Земјите како Унгарија кои се длабоко зависни од руските енергенси може да добијат дополнителна флексибилност како дел од компромисот за да се откажат од своето противење на новите санкции, според лице запознаено со ова прашање.
Позицијата на Унгарија за воведување санкции за руската нафта и гас „не е променета, ние не ја поддржуваме“, рече владиниот портпарол Золтан Ковач во објава на Фејсбук во понеделникот. Тој го демантираше извештајот на германската телевизиска мрежа ЗДФ, која во неделата објави дека Унгарија и Австрија ги укинале заканите за вето.
Орбан, кој беше реизбран минатиот месец, претходно ги нарече санкциите за руската енергија своја „црвена линија“.
Неговата влада се согласи со Русија да дозволи претворање на нивните плаќања за гас во рубли, тестирајќи ја политиката на санкции на ЕУ. Русија минатата недела го прекина снабдувањето со гас за Полска и Бугарија, со што ја исполни заканата дека ќе го запре протокот доколку плаќањата не се вршат во рубљи.
Министрите за енергетика на ЕУ се состануваат денеска во Брисел за да разговараат за барањата на Русија за природен гас што треба да се купува во рубљи, а најверојатно ќе разговараат и за пакетот санкции за нафтата.
