Нема детали за евентуални предлози од Вархеји за решавање на спорот помеѓу Скопје и Софија

Еден ден по официјалната посета на еврокомесарот за проширување и добрососедство Оливер Вархеји на Скопје, нема детали за идеите разгледани на масата за изнаоѓање решение за спорот што го наметна Бугарија. Тој се сретна со државни и политички лидери во земјава, но никој не ги соопшти своите впечатоци. Се шпекулира дека Вархеји дојде со конкретни предлози и идеи за решенија, откако престојуваше во Софија пред една недела. Премиерот Зоран Заев очекува позитивен заклучок за Македонија на самитот меѓу земјите од Западен Балкан и ЕУ.

„Се надевам дека на 6 октомври во Словенија ќе бидат преземени неопходни чекори за деблокирање на нашиот процес на интеграција во Европската Унија, што очекуваме да се случи до крајот на декември. Нашиот напредок во ЕУ мора прво и основно да зависи од внатрешните реформи поврзани со поглавјата, законодавниот дом на ЕУ и постигнувањето на европските стандарди“, рече премиерот Заев.

Важно е за ЕУ ​​сега да има конкретни резултати за интеграција на Западен Балкан во ЕУ, рече комесарот Вархеји преку видео конференција.

„Се надевам дека следната недела ќе слушнете многу јасни пораки од европските челници во овој поглед. Вчера бев во Скопје и една недела порано бев во Софија. Се обидовме да работиме за да се движиме напред. Да одиме напред што е можно побрзо. Сакаме прашањето да се движи напред оваа година“, порача Вархеји.

Заев и Вархеји ги дадоа своите впечатоци на Форумот за граѓанско општество на Западен Балкан во Скопје. Детали од средбата Вархеји – Мицкоски не соопштуваат од ВМРО ДПМНЕ. Партијата на Мицкоски смета дека почетокот на преговорите со ЕУ не се случува поради стагнација со реформите.

На Самитот во Словенија, неизвесно е дали земјите членки ќе можат да обезбедат консензус за поддршка на европската иднина на Западен Балкан. Сомневања имаат Холандија, Франција и Данска. Грчкиот премиер Кирјакос Мицотакис изјави дека не ја поддржува блокадата од Бугарија, за која вели дека непотребно создава компликации.

Фатлуме Дервиши