Независните институции остануваат зависни од политиката

Независните регулаторни институции и тела продолжуваат да се политизираат со назначување на лица со политичко минато или сегашност. Неодамнешните случаи со предлог за нови членови на Комисијата за заштита од дискриминација, оној со Народниот правобранител и со ДИК предизвикаа реакции во јавноста. Мрежата за заштита од дискриминација повикува членовите во Комисијата за заштита од дискриминација што побрзо да се изгласат, иако некои од предложените фрлаат магла врз нивната мисија.

Мрежа за заштита од дискриминација

„Го поздравуваме потранспарентниот начин на избор на членови на комисијата и изборот на некои од членовите кои имаат богато искуство во оваа област, но сепак изборот на дел од членовите фрла сенка врз транспарентноста на процесот и идната независност на институцијата.”

Меѓу кандидатите има двајца поранешни пратеници, едниот од СДСМ, а другиот од ДУИ, односно Весна Бендевска и Ирфан Деари. Бендевска беше пратеничка на СДСМ три мандати од 2006 до 2014 година. Деари беше пратеник на ДУИ од 2011 до 2014 година. Бидејќи законот предвидува лицата да не битат партиски членови, тие потпишаа изјава дека во моментов не се членови на ниту една политичка партија. Но, лути на случувањата, ВМРО-ДПМНЕ ја одложи пленарната седница и новите членови не беа изгласани поради недостиг на кворум.

Предложен состав на Комисијата за борба против дискриминација

• Игор Јадровски, Хелсиншки комитет, дипломиран правник, 5 години мандат
• Неда Чаловска Димовска, Хелсиншки комитет, дипломиран правник, 5 години мандат
• Лимко Бејзароски, политиколог и доктор по историски науки, 5 години мандат
• Ирфан Деари, матичен лекар, поранешен пратеник, 5 години мандат
• Кире Василев, дипломиран политиколог, 3 години мандат
• Исмаил Камбери, правни науки, 3 години мандат
• Весна Бендевска, психолог, поранешен заменик, 3 години мандат

Мрежата за заштита од дискриминација, исто така, го потенцира недостигот на родова рамнотежа во ова важно тело, како и отсуството на членови, односно лица со попреченост, иако се пријавиле квалификувани кандидати.

Невладините организации и порано го критикуваа и составот на оваа комисија. Со неа раководеше Александар Даштевски, кој е сега избран за претседател на Државната изборна комисија. Даштевски беше близок со ВМРО-ДПМНЕ.

Центар за слободи „Цивил“

„Гласот на Даштевски за претседател на ДИК не претставува ништо повеќе од сигнал дека процесот на реформи е предодреден да пропадне.“

Во меѓувреме, пред два дена, собраниската комисија за именувања го номинираше Насер Зибери за нов народен правобранител. Зибери е политички обоена личност. Последно, тој изборите летово беше кандидат за премиер од редовите на ДУИ. Собраниската процедура за избор на нов омбудсман Мрежата за заштита од дискриминација ја оквалификува како нетранспарентна.

И за Народниот правобранител и за Комисијата за заштита од дискриминацијата, како и за Државната изборна комисија, законите предвидуваат јавен оглас и избор на компетентни и независни лица, во согласност со меѓународните препораки.

Fatlume Dervishi