Nisin projektet për kanalizim dhe ujësjellës në Llaskarcë, bashkëpunim mes Komunës së Sarajit dhe dy ministrive

Gazetare: Ajnur Bafqari

Fillojnë punimet për ndërtimin e infrastrukturës nëntokësore dhe rrugore në fshatin Llaskarcë të komunës së Sarajit. Bëhet fjalë për ndërtimin e kanalizimit atmosferik, ujësjellësin dhe rregullimin e rrugëve që mbulohen me rreth 243 milion denarë apo rreth 4 milion euro, para të siguruara nga thirrja e dytë e kredisë hungareze.

“Është projekt i cili garanton zhvillim modern të infrastrukturës në këtë vendbanim dhe zhvillim lokal po të këtij vendbanimi”, tha Muhamed Elmazi, Kryetar i Komunës së Sarajit.

Pjesë e projekteve janë ministria e transportit me 136 milion denarë, ajo e mjedisit  me 85 milion dhe komuna e Sarajit me 22 milion denarë.

“Ministria e Ambientit Jetësor dhe Planifikimit Hapësinor nga thirrja e dytë e kreditit hungarez ka siguruar mbi 85 milion denarë, për të realizuar këtë pjesë të projektit, sepse siç theksoi edhe kryetari i komunës, bëhet fjalë për disa projekte që sot ne fillojmë t’i realizojmë”, u shpreh Muhamed Hoxha, Ministër i Ekologjisë.

“Ky projekt ka të bëjë me rikonstruimin e disa rrugëve brenda këtij fshati, të cilat në gjatësi totalisht përfshijnë 4 kilometra dhe janë me vlerë prej 2 milion euro”, tha Kaltrina Zekolli Shaqiri, zv ministre e transportit dhe lidhjeve.

Përfaqësuesit e pushtetit qendror thanë se në bashkëpunim me pushtetin lokal do të realizohen edhe projekte të tjera në këtë Komunë./ Alsat.mk