Pendarovski formosi sot Dekretin për shpalljen e Ligjit për Regjistrim të Popullsisë

Presidenti i shtetit Stevo Pendarovski, pas konsultave me ekspert juridik, sot ka firmosur Dekretin për Ligjin për Regjistrimin e Popullsisë. Në njoftimin e Kabinetit të Presidentit thuhet se presidenti Pendarovski pret që procesi i zbatimit të regjistrimit të mos politizohet, ndërsa të dhënat e grumbulluara të jenë në shërbim të zhvillimit të përgjithshëm, me çka do të mundësohet formimi i strategjive afatgjate në sferat vitale të shtetit.

Kujtojmë se më 21 janar, Kuvendi i Maqedonisë së Veriut votoi propozim-ligjin për regjistrim, që duhet të mbahet në muajin prill të këtij viti. Me këtë ligj duhet të mundësohet që në Maqedoninë e Veriut të zbatohet regjistrimi pas 19 vitesh.

Regjistrimi do të zbatohet në periudhën prej 1 deri më 21 prill të vitit 2021, me përdorimin e kompjuterit bartës, në aplikacion të veçantë, me ç’rast detyrimisht zbatohen masa teknike dhe organizuese në pajtim me dispozitat nga sfera e mbrojtjes së të dhënave personale.

Regjistrimi i fundit i popullsisë në vend është mbajtur në vitin 2002, sipas të cilit numri i popullatës ishte 2.022.547. Në vitin 2011 filloi të realizohet regjistrimi, por u ndërpre pasi anëtarët e komisionit regjistrues dhanë dorëheqje kolektive dhe të parevokueshme.