Vendimi i parë i qeverisë shqiptare: Jo më udhëtime në biznes klas

Kryeministri i Shqipërisë Edi Rama mbajti mbledhjen e parë të qeverisë në mandatin e tretë, menjëherë pas betimit në Presidencë. Vendimi i parë i qeverisë së re ishte ai lidhur me kodin etik të qeverisë, i cili duhet të zbatohet nga çdo ministër apo zëvendës i tij. Sipas kodit, anëtarët e qeverisë nuk duhet të udhëtojnë në biznes klas, as që nuk mund të pushojnë jashtë shtetit apo të darkojnë dhe drekojnë në festa kur janë në orar të punës.

- Advertisements -

“Asnjë udhëtim pune jashtë shteti me lekët e shtetit në qendër apo rajone që nuk ka marrë miratim dhe nuk është njoftuar Ministria për Europën dhe Punët e Jashtme nuk konsiderohet në përputhje me etikën e qeverisë. Do parashikohen sanksione për çdo shkelje të normave etike. Shpenzimet e vizitave të punës jashtë shteti që nuk mbyllet me dorëzimin në ministri për raportin e vizitës nuk paguhet nga thesari i shtetit”- deklaroi Edi Rama, kryeministër i Shqipërisë.

Zëdhënësja e grupit parlamentar të Partisë Demokratike, Oriola Pampuri ka reaguar për mbledhjen e parë të qeverisë duke thënë se kryeministri Rama i hedh hi syve të shqiptarëve duke e shfaqur si risi Kodin Etik.

“Propaganda bajate e qeverisë më të korruptuar në Ballkan, i darkave te Nusreti dhe hoteleve 700 euro nata, shfaq si risi kodin e etikës që qysh prej 2013-ës përdori për t’u hedhur hi syve, qytetarëve. Të gjithë e mbajmë mend me sa ‘etikë’ u ngrit sistemi nepotik në qeveri, me sa ‘etikë’ vëllezër e kushërinj ministrash gëzuan paprekshmërinë për t’u kthyer në zota të drogës dhe trafiqeve”, thuhet në reagimin e Pampurit.

Kabineti i mandatit të tretë qeverisës të socialistëve përbëhet nga 15 ministri, nga të cilët katër ministra pa portofol. Dymbëdhjetë ministri do të drejtohen nga gratë dhe tri tjera nga burrat. Programi i Qeverisë së re e ka drejtuar fokusin te rindërtimi pas tërmetit të vitit 2019 dhe menaxhimi i pandemisë, mirëqenia e qytetarëve; modernizimi për zhvillim të ekonomisë prodhuese, familja dhe forcimi i shtetit ligjor.

Alsat

 

LEXO EDHE:

Back to top button