Daniel Jellinek, një prej biznesmenëve më të pasur të Hungarisë, dyshohet për përfshirje në një hetim të madh për korrupsion që lidhet me kompaninë shtetërore të autobusëve Volánbusz.
Miliarderi hungarez Daniel Jellinek është paraburgosur në kuadër të hetimit për një aferë të dyshuar korruptive që lidhet me kompaninë shtetërore të transportit Volánbusz.
Gjykata në Budapest ka caktuar një muaj paraburgim për Jellinek dhe ish-drejtorin e Agjencisë Kombëtare Hungareze për Menaxhimin e Pronës Shtetërore, Norbert Szivek. Të dy dyshohen për përfshirje në parregullsi dhe ryshfet në lidhje me kontratat e transportit dhe blerjen e autobusëve.
Hetimi është zhvilluar me një operacion të gjerë të autoriteteve hungareze. Rreth 40 oficerë kanë marrë pjesë në kontrolle dhe sekuestrime në disa lokacione, ndërsa disa persona janë marrë në pyetje si të dyshuar.
Në qendër të hetimeve janë transaksione të kryera gjatë periudhës 2015–2018. Sipas prokurorisë, ato mund t’i kenë shkaktuar kompanisë shtetërore të transportit dëm prej rreth 10 miliardë forintësh. Autoritetet po hetojnë edhe blerjen e 608 autobusëve të dorës së dytë, për të cilët dyshohet se janë paguar me çmime dukshëm më të larta.
Emri i Daniel Jellinek është i njohur edhe për shkak të lidhjeve të tij të mëparshme të biznesit me István Tiborcz, dhëndrin e kryeministrit hungarez Viktor Orbán. Jellinek drejton grupin Indotek, një prej kompanive të mëdha të pasurive të paluajtshme në Hungari.
Kompania Indotek i ka mohuar akuzat ndaj biznesmenit. Sipas kompanisë, Jellinek është paraqitur vullnetarisht për t’u marrë në pyetje dhe ka bashkëpunuar me autoritetet. Kompania këmbëngul se ai nuk ka kryer asnjë vepër penale në lidhje me rastin.
Jellinek ka qenë më parë në procese gjyqësore. Në vitin 2022, ai u dënua për bashkëpunim në një çështje që lidhej me mashtrim buxhetor, ndërsa në fillim të vitit 2025 u deklarua fajtor në një rast tjetër për fatura fiktive dhe dëmtim të sistemit tatimor. Për këtë të fundit, ai u gjobit me 250 milionë forinta.
Hetimi për aferën Volánbusz vazhdon, ndërsa autoritetet hungareze po hetojnë rolin e personave të dyshuar dhe mënyrën se si janë zhvilluar transaksionet e kontestuara./Alsat.mk
