BE-ja propozon një ndryshim të madh të pagesave përmes bankave

Komisioni Evropian ka propozuar një ligj sipas të cilit bankat do të duhet të kryejnë menjëherë të gjitha transaksionet në euro – pa kosto shtesë.

Sipas propozimit të Komisionit, pagesat në BE dhe Zonën Ekonomike Evropiane do të vendosen menjëherë në llogari, pavarësisht nga ora dhe dita e javës dhe nëse është ditë pune apo jo pune.

Tani duhet të prisni deri në tre ditë, veçanërisht nëse pagesa bëhet në fund të javës dhe zakonisht duhet të prisni deri të hënën që paratë të shfaqen në llogarinë tuaj, raporton euronews.

“Të kalosh nga një pagesë e ditës tjetër në një pagesë 10 sekondash është si të kalosh nga posta e zakonshme në email”, tha Komisionerja e Shërbimeve Financiare, Mairead McGuinness.

“Sot, pothuajse nëntë nga dhjetë transferta krediti në euro janë ende të përpunuara si transferta tradicionale ‘të ngadalta’. Nuk ka asnjë arsye pse shumë qytetarë dhe kompani në BE nuk mund të dërgojnë dhe marrin menjëherë para, teknologjia që mundëson pagesat e menjëhershme ekziston që nga viti 2017”, shton komisionerja.

Në praktikë, ndryshimet do të nënkuptojnë:

Të gjitha bankat duhet të ofrojnë pagesa të menjëhershme për të gjithë klientët e tyre;

Pagesat e menjëhershme do të ofrohen pa kosto shtesë sesa transfertat normale të kredisë;

Bankat do të duhet të kontrollojnë nëse numri i llogarisë përputhet me emrin e përfituesit të pagesës dhe të paralajmërojnë paguesin për çdo rrezik mashtrimi.

Aktualisht, disa banka paguajnë shumë më tepër për një transfertë pagese të menjëhershme – deri në 30 euro në disa raste – sesa për transfertat tradicionale.

Lëvizja vjen mes reformave më të gjera financiare të BE-së, duke përfshirë futjen e shumëpritur të një euro dixhitale.

Projektligji i propozuar, i cili ka nevojë për miratim nga shtetet e BE-së dhe Parlamenti Evropian për t’u bërë ligj, do t’u japë bankave në eurozonë gjashtë muaj kohë për të nisur projektin e pagesave të menjëhershme në euro.

Bankave në BE do t’u jepen 24 muaj për t’u përshtatur me rregullat e reja.