Охрид солидно посетен за дочекот на Новата 2022 година, но има поплаки – собите не се добро затоплени

Охрид уште од вчера почна да се полни со гости и да потсетува на туристички центар како што и му доликува. Градот гостите ги пречека со сонце и температура далеку повисока од вообичаената за овој дел од годината, а така, барем според најавите, се очекува да биде и наредните празнични денови.

Според она што може да се забележи најбројни се гостите од соседните држави, најмногу од Србија и Црна Гора. Претежно се работи за помлади лица, кои се тука да ги минат новогодишните празници и најчесто доаѓаат групно, но секако има и индивидуални посети. Гостите според она што го кажуваат, задоволни од времето, убавината на градот, празничната атмосфера, но со забелешки за сместувањето, најмногу на незатоплените соби.