Пописот нема да влијае на изборниот процес, иселениците не го губат правото на глас

На дијаспората нема да и биде ускратено правото на глас. Премиерот Зоран Заев вели дека без оглед на пописот на населението и категоризацијата на граѓаните дека се или не жители/резиденти, правото на глас на никому нема да му биде ускратено.

Во текот на денот, претседателот Стево Пендаровски се состана со министерот за правда Бојан Маричиќ, и директорот на Заводот за статистика Апостол Симовски. На состанокот се разговараше за подготвеноста на институциите и важноста за нивната соработка во спроведувањето на процесот на попис. Претседателот побара сите потребни стандарди да бидат вклучени во пописот, и да се гарантира демократски и кредибилен процес. Законот за попис на населението е во собраниска процедура, додека неговото усвојување се очекува во првата половина на јануари.

По одобрувањето, до 1 март, Државниот завод за статистика мора да ја подготви методологијата за спроведување на пописот, додека процесот ќе се одвива од 1 до 21 април. Законот предвидува дополнителен рок за попис за лица кои за време на пописот не се во земјата, или не се пријавуваат по електронски пат.

Адријан Керими